മലപ്പുറം : യൂത്ത് കോൺഗ്രസ് സംസ്ഥാന വൈസ് പ്രസിഡന്റ് കെ.എസ്.ശബരീനാഥിന്റെ അറസ്റ്റിൽ പ്രതിഷേധിച്ച് യൂത്ത് കോൺഗ്രസ് മലപ്പുറം ജില്ലാ കമ്മിറ്റി നടത്തിയ ദേശീയപാത ഉപരോധത്തിനു നേരെ പൊലീസ് ലാത്തിവീശി. പിന്നീട് നടന്ന പൊലീസ് സ്റ്റേഷൻ മാർച്ചിൽ പങ്കെടുത്തവരുൾപ്പടെ 18 പേർ അറസ്റ്റിൽ. ചൊവ്വാഴ്ച വൈകിട്ട് 5.30നായിരുന്നു സംഭവം.
പ്രകടനമായെത്തിയ പ്രവർത്തകർ കുന്നുമ്മലിൽ കോഴിക്കോട്–പാലക്കാട് ദേശീയപാത ഉപരോധിക്കുകയായിരുന്നു. ഉടൻ പ്രവർത്തകർക്കു നേരെ പൊലീസ് ലാത്തിവീശി. യൂത്ത് കോൺഗ്രസ് സംസ്ഥാന ജനറൽ സെക്രട്ടറി പി.കെ.നൗഫൽ ബാബു, ജില്ലാ പ്രസിഡന്റ് ഷാജി പച്ചേരി, ജില്ലാ ജനറൽ സെക്രട്ടറി ഷഫി ജഹാൻ എന്നിവരെയുൾപ്പടെയാണ് ഏഴു നേതാക്കളെയാണ് ആദ്യം അറസ്റ്റ് ചെയ്തത്.
ഇവരെ വിട്ടയയ്ക്കണമെന്നാവശ്യപ്പെട്ടാണ് പ്രവർത്തകർ മലപ്പുറം പൊലീസ് സ്റ്റേഷനിലേക്ക് പ്രകടനം നടത്തിയത്. സ്റ്റേഷൻ ഉപരോധത്തിനൊരുങ്ങിയ 11 പ്രവർത്തകരെയും പൊലീസ് അറസ്റ്റ് ചെയ്യുകയായിരുന്നു.
