കൊല്ലം: മെഡിക്കൽ പ്രവേശനപരീക്ഷ ‘നീറ്റ്’ എഴുതാനെത്തിയ വിദ്യാർഥിനികളുടെ ഉൾവസ്ത്രം അഴിപ്പിച്ച കേസിൽ അഞ്ചുപേർക്ക് ജാമ്യം. മാർത്തോമ്മാ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ആൻഡ് ടെക്നോളജിയിലെ അധ്യാപകന് പ്രിജി കുര്യന്, നിരീക്ഷകൻ പെരങ്ങമ്മല കോളജിലെ ഡോ. ജെ.ഷംനാദ്, പരിശോധനാ ഡ്യൂട്ടിക്കു സ്വകാര്യ ഏജൻസി വഴിയെത്തിയ ജ്യോത്സ്ന ജ്യോതി, കോളജിലെ ശുചീകരണ ജീവനക്കാരായ എസ്.മറിയാമ്മ, കെ.മറിയാമ്മ എന്നിവർക്കാണ് കടയ്ക്കൽ ജുഡീഷ്യൽ ഒന്നാം ക്ലാസ് മജിസ്ട്രേറ്റ് ജാമ്യം നൽകിയത്.
പ്രിജി കുര്യനെയും ഷംനാദിനെയും ഇന്നും മറ്റു മൂന്നുപേരെ ഇന്നലെയുമാണ് അറസ്റ്റ് ചെയ്തത്. പരിശോധനാ ഡ്യൂട്ടിക്കെത്തിയ ഗീതു, ബീന എന്നിവരെയും ഇന്നലെ അറസ്റ്റ് ചെയ്തിരുന്നു. ഡിഐജി ആർ.നിശാന്തിനിയുടെ നേതൃത്വത്തിൽ ചോദ്യംചെയ്ത ശേഷം അറസ്റ്റ് ചെയ്യുകയായിരുന്നു. സ്ത്രീത്വത്തെ അപമാനിച്ചതിനും സ്വകാര്യത ഹനിച്ചതിനുമാണ് കേസ്.
