ചെന്നൈ : വാട്സാപ്പ് ഗ്രൂപ്പുകളില്‍ അംഗങ്ങള്‍ പോസ്റ്റ് ചെയ്യുന്ന സന്ദേശങ്ങള്‍ക്ക് അഡ്മിന്‍ ഉത്തരവാദിയല്ലെന്ന് മദ്രാസ് ഹൈക്കോടതി വിധിച്ചു. മുംബൈ, ഡല്‍ഹി ഹൈക്കോടതികള്‍ നേരത്തേ സമാന ഉത്തരവു പുറപ്പെടുവിച്ചിരുന്നു. വാട്സാപ്പ് ഗ്രൂപ്പുകളില്‍ അഡ്മിനു പരിമിതമായ നിയന്ത്രണം മാത്രമേയുള്ളൂവെന്നും അംഗങ്ങളുടെ സന്ദേശങ്ങള്‍ സംയുക്ത ആസൂത്രണത്തോടെയാണെന്നു കരുതാനാകില്ലെന്നും ഹൈക്കോടതി പറഞ്ഞു. ആസൂത്രണം നടത്തിയെന്നതു തെളിയാതെ മറ്റൊരാളുടെ സന്ദേശത്തിന്റെ പേരില്‍ അഡ്മിനെതിരെ നടപടിയെടുക്കാന്‍ പാടില്ല. അഭിഭാഷകരുടെ വാട്സാപ്പ് ഗ്രൂപ്പിലെ സന്ദേശത്തിന്റെ പേരില്‍ അഡ്മിനെതിരെ പൊലീസ് കേസെടുത്തതിനെതിരെയുള്ള ഹര്‍ജിയാണു പരിഗണിച്ചത്.
