ഹൈദരാബാദ് : തെലങ്കാനയിൽ നൂപുർ ശർമ്മയെ പിന്തുണച്ച ബിജെപി എംഎൽഎ അറസ്റ്റിൽ. മുസ്ലിം സമുദായ സംഘടനകളുടെ കടുത്ത പ്രതിഷേധത്തിനിടെയാണ് ടി രാജാസിങ്ങ് എംഎൽഎയെ ഹൈദരാബാദ് പൊലീസ് അറസ്റ്റ് ചെയ്തത്. നൂപുർ ശർമ്മയെ പിന്തുണച്ചുള്ള പ്രസ്താവനയ്ക്കും പ്രവാചകന് എതിരായ പ്രസ്താവനയ്ക്കും പിന്നാലെ പ്രതിഷേധം ശക്തമായ സാഹചര്യത്തിലാണ് നടപടി. നേരത്തെ സംഘപരിവാർ ഭീഷണിയെത്തുടർന്ന് കരിയർ അവസാനിപ്പിക്കാൻ തീരുമാനിച്ച സ്റ്റാന്റ് അപ്പ് കൊമേഡിയൻ മുനവർ ഫാറൂഖിയുടെ പരിപാടി തടഞ്ഞതും രാജാസിങ്ങിന്റെ നേതൃത്വത്തിലായിരുന്നു.
എംഎൽഎയുടെ അറസ്റ്റിന് പിന്നാലെ ബിജെപി സംസ്ഥാന അധ്യക്ഷൻ ബണ്ഡി സഞ്ജയ് കുമാറിനെയും കസ്റ്റഡിയിലെടുത്തിട്ടുണ്ട്. മുഖ്യമന്ത്രി കെ ചന്ദ്രശേഖര റാവുവിന്റെ മകൾ കവിതയുടെ വീട്ടിലേക്ക് നടത്തിയ പ്രതിഷേധത്തിന്റെ പേരിലാണ് ഇയാളെ കസ്റ്റഡിയിലെടുത്തത്. എംഎൽഎയുടെ അറസ്റ്റും നേതാക്കൾക്കെതിരായ നീക്കവും പ്രതികാര നടപടിയെന്ന് ബിജെപി പ്രതികരിച്ചു. മുഖ്യമന്ത്രി കെ ചന്ദ്രശേഖര റാവു പകവീട്ടുകയാണെന്നും തിരിച്ചടിയുണ്ടാകുമെന്നും ബിജെപി നേതൃത്വം വ്യക്തമാക്കി.
