കൊച്ചി : മലയാറ്റൂരിൽ വീടു കുത്തിത്തുറന്നു വൻ മോഷണം. കൊറ്റമത്തു വീട്ടിൽ മണവാളൻ ഔസേപ്പ് മാത്യുവിന്റെ വീട്ടിലാണു മോഷണം നടന്നത്. 25 പവൻ സ്വർണവും 41000 രൂപയും നഷ്ടമായി. വീടിന്റെ പിൻവശത്തെ വാതിലിന്റെ ഓടമ്പൽ തകർത്താണു മോഷ്ടാവ് അകത്തു കയറിയത്. കിടപ്പു മുറിയിലുണ്ടായിരുന്ന താക്കോൽ കണ്ടെത്തി അലമാര തുറന്നാണു പണവും സ്വർണവും മോഷ്ടിച്ചത്. പുലർച്ചെ രണ്ടു മണിക്കും മൂന്നിനും ഇടയിലാണു മോഷണം നടന്നതെന്നാണു കരുതുന്നത്. ഈ സമയം വീട്ടിൽ എല്ലാവരും ഉണ്ടായിരുന്നെങ്കിലും മോഷണം ആരുടെയും ശ്രദ്ധയിൽ പെട്ടില്ല. സമീപ പ്രദേശത്തുള്ള രണ്ടു വീടുകളിലും മോഷണ ശ്രമം നടന്നെങ്കിലും കാര്യമായ നഷ്ടമുണ്ടായിട്ടില്ല. ഒരൂ വീട്ടിൽ നിന്ന് 500 രൂപ മോഷണം പോയിട്ടുണ്ട്. മറ്റൊരു വീടിന്റെ വാതിൽ തകർത്ത നിലയിൽ കണ്ടെത്തി.
വീട്ടിൽ മോഷണം നടന്ന വിവരം മാത്യുവിന്റെ വീട്ടുകാർ അറിഞ്ഞിരുന്നില്ല. സമീപ വീട്ടിൽ മോഷണം നടന്ന വിവരം അറിയിച്ചതിനെ തുടർന്നു നടത്തിയ പരിശോധനയിലാണു സ്വന്തം വീട്ടിൽ പരിശോധന നടന്നതും മോഷണം തിരിച്ചറിയുന്നതും. തുടർന്നു വിവരം പോലീസ് സ്റ്റേഷനിൽ അറിയിക്കുകയായിരുന്നു. പോലീസ് സ്ഥലത്തെത്തി വീടുകളിൽ പരിശോധന നടത്തുന്നുണ്ട്.
