നോയിഡ : പിറ്റ് ബുൾ വര്ഗത്തിൽപ്പെട്ട നായ കടിച്ച് ഉടമയുടെ അമ്മ മരിച്ച സംഭവം മാസംങ്ങൾക്ക് മുമ്പ് വലിയ ഞെട്ടലാണ് ഉണ്ടാക്കിയത്, അതിന് പിന്നാലെ ഇപ്പോഴിതാ പിറ്റ് ബുള്ളുകളെ അതിന്റെ ഉടമകൾ ഒന്നടങ്കം ഉപേക്ഷിക്കുകയാണ്. നോയിഡ കേന്ദ്രീകരിച്ച് പ്രവര്ത്തിക്കുന്ന ഒരു എൻജിഒയുടെ നോയിഡയിലെ തെരുവ് നായകൾക്കായുള്ള ആലയത്തിന് മുന്നിൽ ആറ് ബിറ്റ് ബുള്ളുകളെയാണ് അതിന്റെ ഉടമകൾ ഉപേക്ഷിച്ച് പോയത്. കഴിഞ്ഞ രണ്ട് മാസത്തിനിടെയാണ് ഇത്രയും പിറ്റ്ബുള്ളുകൾ ഉപേക്ഷിക്കപ്പെട്ടതെന്ന് എൻജിഒ സ്ഥാപകൻ സഞ്ജയ് മൊഹാപത്ര പറഞ്ഞു.
രാജ്യത്ത് അങ്ങോളമിങ്ങളമുള്ള പിറ്റ് ബുൾ് ഉടമകളിൽ നിന്നായി 200 ലേറെ ഫോൺ കോളുകളാണ് ഇതിനോടകം ഇവര്ക്ക് ലഭിച്ചത്. ലക്നൗവിൽ ഉടമയുടെ അമ്മയെ പിറ്റ് ബുൾ നായ കൊന്നതിന് പിന്നാലെയാണ് ഇതെന്നും ഇവര് പറയുന്നു. 82 കാരിയായ സ്ത്രീയെയാണ് നായ കടിച്ചുകൊന്നത്. നായയുടെ ആക്രമണത്തിൽ ഗുരുതരമായി പരിക്കേറ്റ സ്ത്രീ അധികം വൈകാതെ മരിക്കുകയായിരുന്നു. ഇതോടെ പിറ്റ് ബുള്ളിനെ വീട്ടിൽ വളര്ത്താൻ ആളുകൾക്ക് ഭയമായതാണ് ഉപേക്ഷിക്കലിന് കാരണം.
പിറ്റ് ബുൾ നായകളെ റോഡുകളിൽ ഉപേക്ഷിക്കുന്നത് പ്രശ്നത്തിന് പരിഹാരമല്ലെന്നും ട്രെയിനിംഗ് നൽകുകയാണ് വേണ്ടതെന്നും സഞ്ജയ് മൊഹാപത്ര പറഞ്ഞു. പിറ്റ് ബുള്ളുകളെ തെരുവിൽ ഉപേക്ഷിക്കുന്നത് കൂടുതൽ അപകടകരമാണ്. ഈ നായകളെ എന്തുകൊണ്ട് ഉടമകൾക്ക് പരിശീലിപ്പിച്ചുകൂടാ? ഈ വളര്ത്തുമൃഗങ്ങളുടെ ഉത്തരവാദിത്വം ഏറ്റെടുക്കാൻ വയ്യാത്തതാണ് കാരണം, വീട്ടിൽ ഒരു അലങ്കാരമായി മാത്രമാണ് ഇവയെ അവര് കാണുന്നതെന്നും അദ്ദേഗം കൂട്ടിച്ചേര്ത്തു. നായകളെ ഉപേക്ഷിക്കുന്നത് അവസാനിപ്പിക്കാൻ ബോധവൽക്കരണ ക്യാംപുകൾ നടത്താനൊരുങ്ങുകയാണ് തന്റെ എൻജിഒ എന്നും സഞ്ജയ് മൊഹാപത്ര വ്യക്തമാക്കി.
