കണ്ണൂര് : കാലാവസ്ഥാവകുപ്പിന്റെ കണക്കുപ്രകാരം 60 വര്ഷത്തിനിടെ കേരളത്തില് കൂടുതല് മഴ ലഭിച്ച വര്ഷമായി 2021. ജനുവരി ഒന്നുമുതല് ഡിസംബര് 31 വരെയുള്ള കാലയളവില് സംസ്ഥാനത്ത് പെയ്തത് 3610.1 മില്ലിമീറ്റര് മഴ. 120 വര്ഷത്തിനിടെ കൂടുതല് മഴ രേഖപ്പെടുത്തിയ ആറാമത്തെ വര്ഷവുമാണ് 2021. 1961-ല് രേഖപ്പെടുത്തിയ 4257.8 മില്ലിമീറ്റര് മഴയാണ് ഇതുവരെയുള്ള റെക്കോഡ്. 1924-ലും (4226.4), 1933-ലും (4072.9) കേരളത്തില് 4000 മില്ലിമീറ്ററില് കൂടുതല് മഴ ലഭിച്ചു. ഇത്തവണ ശൈത്യകാല സീസണിലും തുലാവര്ഷ സീസണിലും ലഭിച്ച മഴ സര്വകാല റെക്കോഡ് മറികടന്നിരുന്നു. വേനല്മഴ സീസണിലും മികച്ച ആറാമത്തെ മഴയെന്ന റെക്കോഡ് സ്ഥാപിച്ചു.
ജനുവരി, ഒക്ടോബര്, നവംബര് മാസങ്ങളിലെ മഴയും സര്വകാല റെക്കോഡ് തിരുത്തി. കൂടുതല് മഴ ലഭിച്ചത് പത്തനംതിട്ട ജില്ലയിലാണ് (4993.9), രണ്ടാമത് കോട്ടയം (4586.8). കുറവ് മഴ പാലക്കാട് (2441.7), തിരുവനന്തപുരം (2793.1) ജില്ലകളിലാണ്. പോയവര്ഷം 25 ന്യൂനമര്ദങ്ങള് രൂപപ്പെട്ടപ്പോള് അഞ്ചെണ്ണം ചുഴലിക്കാറ്റായി ശക്തിപ്രാപിച്ചു.
