ചെന്നൈ : പ്രണയാഭ്യർഥന നിരസിച്ചതിന് പ്ലസ് വൺ വിദ്യാർഥിനിയുടെ വായിൽ യുവാവ് കീടനാശിനിയൊഴിച്ചു. പിന്നീട് ഇയാൾ സ്വയം കീടനാശിനി കുടിക്കുകയും കൈഞരമ്പ് മുറിക്കുകയും ചെയ്തു. ഇരുവരെയും ആശുപത്രിയിൽ പ്രവേശിപ്പിച്ചു. തൂത്തുക്കുടി പുതിയംപുത്തൂരിനടുത്ത് സെവൽകുളം ഗ്രാമത്തിലാണ് സംഭവം. വേൽമുരുകൻ (22) ആണ് ഗ്രാമത്തിൽത്തന്നെയുള്ള പതിനഞ്ചുകാരിയെ ആക്രമിച്ചത്. കുറേനാളായി പെൺകുട്ടിയെ ശല്യംചെയ്തിരുന്ന യുവാവ് കഴിഞ്ഞദിവസം വീട്ടിലെത്തി പ്രണയാഭ്യർഥന നടത്തുകയായിരുന്നു. തന്നെ പ്രണയിക്കണമെന്ന് ഭീഷണിപ്പെടുത്തുകയും ചെയ്തു. വിദ്യാർഥിനി വഴങ്ങുന്നില്ലെന്ന് കണ്ടപ്പോഴാണ് കൈവശം കരുതിയിരുന്ന കീടനാശിനിയെടുത്ത് വേൽമുരുകൻ ബലമായി കുട്ടിയുടെ വായിൽ ഒഴിച്ചത്. പിന്നീട് കീടനാശിനി കുടിച്ച യുവാവ് കത്തികൊണ്ട് കൈയിൽ മുറിവുണ്ടാക്കുകയും ചെയ്തു.
മയങ്ങിവീണ ഇരുവരെയും കണ്ട അയൽക്കാർ ഉടനെ തൂത്തുക്കുടി സർക്കാർ ആശുപത്രിയിലേക്ക് കൊണ്ടുപോയി. പെൺകുട്ടിയുടെ വീട്ടുകാരുടെ പരാതിയിൽ കടമ്പൂർ ഓൾ വുമൺ പോലീസ് വേൽമുരുകനെതിരേ വധശ്രമത്തിനും പോക്സോ വകുപ്പുകളിലും കേസ് രജിസ്റ്റർ ചെയ്തു. ആശുപത്രി വിടുന്നതോടെ വേൽമുരുകന്റെ അറസ്റ്റ് രേഖപ്പെടുത്തുമെന്നും പോലീസ് അറിയിച്ചു.
