കോഴിക്കോട്∙ അധികമായി നൽകുന്ന പാലിന് മലബാർ മിൽമ നവംബർ ഒന്നു മുതൽ 30 വരെ ലിറ്ററിന് അഞ്ചു രൂപ കൂടുതൽ നൽകും. ഒക്ടോബറിൽ മിൽമയിലേക്കു നൽകിയ ശരാശരി പാലളവിൽനിന്നു കൂടുതലായി നൽകുന്ന പാലിനാണ് അധിക വിലയായ അഞ്ചു രൂപ ലഭിക്കാൻ അർഹതയുണ്ടായിരിക്കുക.
ഇത്തരത്തിൽ നവംബറിൽ ഡെയറിയിൽ ലഭിക്കുന്ന അധിക പാലിന് ലിറ്ററിന് അഞ്ചുരൂപ കണക്കാക്കി അർഹരായ ക്ഷീര സംഘങ്ങളുടെ അക്കൗണ്ടുകളിലേക്ക് നിക്ഷേപിക്കും.
പാലിന്റെ വിൽപ്പനവില വർധിപ്പിക്കാതെ നിലവിലെ പ്രതികൂല സാഹചര്യത്തിലും ക്ഷീര കർഷകർക്ക് ഇത്തരം സഹായങ്ങൾ നൽകുവാൻ സാധിക്കുമെന്ന് മിൽമ ചെയർമാൻ കെ.എസ്. മണി, മാനേജിങ് ഡയറക്ടർ ഡോ. പി.മുരളി എന്നിവർ പറഞ്ഞു.
