മോർബി: ഗുജറാത്തിലെ മോർബിയിൽ തൂക്ക് പാലം തകര്ന്ന പ്രദേശം സന്ദര്ശിച്ച് പ്രധാനമന്ത്രി നരേന്ദ്രമോദി. മച്ചു നദിക്ക് മുകളില് പ്രധാനമന്ത്രി വ്യോമ നിരീക്ഷണം നടത്തി. പരിക്കേറ്റവര് ചികിത്സയില് കഴിയുന്ന ആശുപത്രി മോദി സന്ദര്ശിക്കും. പ്രധാനമന്ത്രിയുടെ മൂന്ന് ദിവസത്തെ ഗുജറാത്ത് സന്ദർശനത്തിന്റെ അവസാന ദിനമാണ് ഇന്ന്. ഇന്നലെ ഗുജറാത്ത് രാജ്ഭവനിൽ നരേന്ദ്രമോദിയുടെ അധ്യക്ഷതയിൽ ഉന്നത തലയോഗം വിളിച്ച് ചേർത്തിരുന്നു. അതേസമയം, പാലം പുതുക്കി പണിതത് ടെണ്ടറില്ലാതെ ആണെന്ന് കണ്ടെത്തിയിട്ടുണ്ട്. പഴയ കേബിളുകൾ തന്നെ ഉപയോഗിച്ചെന്നും കണ്ടെത്തി. ദുരന്തത്തിൽ ഇതുവരെ 140 പേരുടെ മരണമാണ് സ്ഥിരീകരിച്ചത്. പാലത്തിൽ അറ്റകുറ്റപണി നടത്തിയ കമ്പനിയുടെ മാനേജർമാർ അടക്കം 9 പേരെ ദുരന്തവുമായി ബന്ധപ്പെട്ട് പൊലീസ് അറസ്റ്റ് ചെയ്തിട്ടുണ്ട്. ഇവരെ കോടതിയിൽ ഹാജരാക്കി കസ്റ്റഡിയിൽ വാങ്ങും.മോര്ബി ദുരന്തത്തില് പ്രധാനമന്ത്രിക്കെതിരെ രൂക്ഷ വിമര്ശനവുമായി പ്രതിപക്ഷം രംഗത്തെത്തിയിരുന്നു. കൊല്ക്കത്തയിലെ മേല്പാലം തകര്ന്നപ്പോള് മമത ബാനര്ജിക്കെതിരെ മോദി നടത്തിയ പരിഹാസം തിരിച്ചുയര്ത്തിയാണ് പ്രതിപക്ഷം വിമര്ശനം കടുപ്പിക്കുന്നത്. സര്ക്കാരിന്റെ അനാസ്ഥ പുറത്ത് കൊണ്ടുവരാന് സംഭവത്തില് ജുഡീഷ്യല് അന്വേഷണം വേണമെന്നും പ്രതിപക്ഷം ആവശ്യപ്പെട്ടു.
