പത്തനംതിട്ട∙ അടൂര്‍ കടമ്പനാട് വിദ്യാര്‍ഥികളെ നാട്ടുകാര്‍ ചേര്‍ന്ന് മര്‍ദിച്ചെന്ന് പരാതി. കടമ്പനാട് കെആര്‍കെപിഎം എച്ച്എസ്‌എസിലെ മൂന്നു വിദ്യാര്‍ഥികളെയാണ് നാട്ടുകാർ മര്‍ദിച്ചത്. മർദനത്തിന്റെ ദൃശ്യങ്ങൾ പുറത്തുവന്നു. ഇന്നലെ വൈകിട്ടാണ് സംഭവം.ഉപജില്ലാ സ്കൂൾ കലോത്സവത്തിന് പങ്കെടുക്കാനായി എത്തിയതായിരുന്നു വിദ്യാർഥികൾ. വെള്ളം കുടിക്കാനായി സ്കൂളിനു പുറത്തേക്കിറങ്ങിയ വിദ്യാർഥികൾക്കിടയിൽ തർക്കമുണ്ടാവുകയും കയ്യാങ്കളിലെത്തുകയും ചെയ്തിരുന്നു. ഇതിനിടെ നാട്ടുകാർ ഇടപെട്ട് വിദ്യാർഥികളെ സംഘം ചേർന്ന് മർദിച്ചെന്നാണ് പരാതി.
അഞ്ചിലധികം പേർ ചേർന്നാണ് മർദിച്ചത്. ശാസ്താംകോട്ട താലൂക്ക് ആശുപത്രിയിൽ ചികിത്സ തേടിയ വിദ്യാർഥികൾ, ഏനാത്ത് പൊലീസ് സ്റ്റേഷനിൽ പരാതി നൽകി. പരാതിയിൽ ആംബുലൻസ് ഡ്രൈവർമാരായ കണ്ണൻ, നിഖിൽ എന്നിവർക്കെതിരെ പൊലീസ് കേസെടുത്തു.
