കാഞ്ഞങ്ങാട് : അഞ്ചുവയസ്സുള്ള മകളെ പീഡിപ്പിച്ച പിതാവിനെ ഹൊസ്ദുർഗ് പോലീസ് അറസ്റ്റ് ചെയ്തു. കാഞ്ഞങ്ങാട്ടെ 42-കാരനാണ് പിടിയിലായത്. രണ്ടുമാസം മുൻപായിരുന്നു സംഭവം. ഇയാളുടെ ഭാര്യയുടെ പരാതിയിലാണ് പോലീസ് പോക്സോ കേസ് രജിസ്റ്റർ ചെയ്തത്. ഇതിനിടെ പ്രതി ഒളിവിൽ പോയതിനാൽ ലുക്ക് ഔട്ട് നോട്ടീസ് പുറപ്പെടുവിക്കുകയും ചെയ്തു. ഗൾഫിലേക്ക് കടക്കാൻ സാധ്യതയുണ്ടെന്ന സൂചന ലഭിച്ചതിനാൽ വിവരം എല്ലാ വിമാനത്താവളങ്ങളിലും നൽകി. കഴിഞ്ഞദിവസം ബെംഗളൂരു വഴി ഗൾഫിലേക്ക് കടക്കാൻ ശ്രമിച്ച ഇയാളെ എമിഗ്രേഷൻ വിഭാഗം തടഞ്ഞുവെക്കുകയും ഹൊസ്ദുർഗ് പോലീസിൽ വിവരം കൈമാറുകയും ചെയ്തു. പോലീസ് വിമാനത്താളത്തിലെത്തി പ്രതിയെ കസ്റ്റഡിയിലെടുത്ത് കാഞ്ഞങ്ങാട്ടെത്തിച്ചു. ഹൊസ്ദുർഗ് ഒന്നാം ക്ലാസ് ജുഡീഷ്യൽ മജിസ്ട്രേറ്റ് (ഒന്ന്) കോടതി പ്രതിയെ രണ്ടാഴ്ചത്തേക്ക് റിമാൻഡ് ചെയ്തു.
