തിരുവനന്തപുരം: വധശ്രമ കേസിലെ പ്രതിയെ പിടികൂടാനെത്തിയ പോലീസുകാരെ മർദിച്ച സംഭവത്തില്‍ മൂന്ന് പേർ അറസ്റ്റില്‍. തൈക്കാപള്ളി പ്ലാവിള പുത്തൻവീട്ടിൽ വിഘ്നേഷ് (23), എരുത്താവൂർ അനീഷ് ഭവനിൽ അരുൺ (25), ആലുവിള സൗമ്യ ഭവനിൽ അരുൺ രാജ് (35) എന്നിവരെയാണ് പോലീസ് പിടികൂടിയത്. വധശ്രമ കേസിലെ പ്രതി ആദർശ് മുടവൂർപ്പാറ ജങ്ഷനിലുണ്ടെന്ന വിവരം ലഭിച്ച് പൊലീസ് കഴിഞ്ഞ ദിവസം രാത്രി 11ഓടെ പ്രതിയെ പിടികൂടാനെത്തുകയായിരുന്നു. മുടവൂർപ്പാറക്ക് സമീപം തട്ടുകടയിൽ ആദർശിനൊപ്പം ഉണ്ടായിരുന്ന സംഘം, ആദർശിനെ പിടിക്കുമോയെന്ന് വെല്ലുവിളിച്ചാണ് പോലീസിനെ ആക്രമിച്ചത്.
പോലീസുകാരായ അരുൺ, അജിത്ത് എന്നിവരെയാണ് സംഘം മർദിച്ചത്. അതിനിടെ ആദർശും കൂട്ടാളി അരുണും പോലീസിനെ വെട്ടിച്ച് രക്ഷപ്പെട്ടു. സംഭവ സ്ഥലത്ത് വെച്ചു തന്നെ വിഘ്നേഷ്, അരുൺ രാജ് എന്നിവരെ കീഴ്പ്പെടുത്തി പോലീസ് കസ്റ്റഡിയിലെടുത്തു. കേസിലെ മൂന്നാം പ്രതി ഇട്ടു എന്ന അരുണിനെ തിങ്കളാഴ്ച കരമനക്ക് സമീപച്ചു വെച്ചാണ് പിടികൂടിയത്. എസ്.എച്ച്.ഒ സുരേഷ് കുമാറിന്റെ നേതൃത്വത്തിലാണ് പ്രതിയെ അറസ്റ്റ് ചെയ്തത്. മൂന്ന് പേരെയും കോടതി റിമാൻഡ് ചെയ്തു.
