കിളിമാനൂർ > തിരുവനന്തപുരത്ത് സ്കൂട്ടർ മറിഞ്ഞ് യുവതി മരിച്ചു. ഒപ്പമുണ്ടായിരുന്ന ഭർത്താവിനും മക്കൾക്കും പരിക്കേറ്റു. ദേശീയപാതയിൽ കല്ലമ്പലം ആഴാംകോണം ജങ്ഷന് സമീപം ഇന്നലെ രാത്രിയായിരുന്നു അപകടം. ആഴാംകോണം മുല്ലമംഗലം വൈഗാ ലാൻഡിൽ പരേതരായ വിജയകുമാരിയുടെയും ഗോപിനാഥകുറുപ്പിന്റെയും മകൾ ശ്രീലക്ഷ്മി (28) ആണ് മരിച്ചത്.
കീഴൂർ ദുർഗാ ഭഗവതി ക്ഷേത്രത്തിലെ ഉത്സവം കണ്ട് വീട്ടിലേക്ക് മടങ്ങവേയായിരുന്നു അപകടം. എതിർദിശയിൽ നിന്ന് വന്ന വാഹനത്തിന് സൈഡ് കൊടുക്കുമ്പോൾ സ്കൂട്ടി മറിയുകയായിരുന്നു. റോഡ് സൈഡിലെ ഫെൻസിങ്ങിൽ ഇടിച്ച് ശ്രീലക്ഷ്മിയ്ക്ക് കഴുത്തിൽ ആഴത്തിലുള്ള മുറിവുണ്ടായി. മകൾ വൈഗ (9)യ്ക്കും ഭർത്താവ് രഞ്ജുലാലിനും പരിക്കേറ്റെങ്കിലും ഗുരുതരമല്ല. ഒന്നര വയസായ നൈഗ പരിക്കുകളില്ലാതെ രക്ഷപ്പെട്ടു.
അബുദാബിയിൽ സ്വകാര്യ കമ്പനിയിൽ ജോലിചെയ്യുന്ന രഞ്ജുലാൽ ഒരാഴ്ച മുൻപാണ് ലീവിന് നാട്ടിലെത്തിയത്. പാരിപ്പള്ളി മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു നൽകിയ മൃതദേഹം ഞായർ വൈകിട്ടോടെ വീട്ടുവളപ്പിൽ സംസ്കരിച്ചു.
