ചെന്നൈ : ചലച്ചിത്ര നടിയും മുൻ എംപിയുമായ ജയപ്രദയുടെ തടവ് ശിക്ഷ റദ്ദാക്കാൻ വിസമ്മതിച്ച് മദ്രാസ് ഹൈക്കോടതി. ചെന്നൈ എഗ്മോർ കോടതിയാണ് കഴിഞ്ഞ ഓഗസ്റ്റില് ജയപ്രദയ്ക്ക് ആറ് മാസം തടവ് ശിക്ഷ വിധിച്ചത്. തിയേറ്റർ നടത്തിപ്പുമായി ബന്ധപ്പെട്ട് ജീവനക്കാരുടെ ഇഎസ്ഐ വിഹിതം അടക്കാത്തതിനാലാണ് ശിക്ഷ. ചെന്നൈ എഗ്മോർ കോടതിയില് നേരിട്ട് ഹാജരാകാനും മദ്രാസ് ഹൈക്കോടതി ജയപ്രദയോട് ആവശ്യപ്പെട്ടു. 15 ദിവസത്തിനകം 20 ലക്ഷം രൂപ കെട്ടിവച്ചാൽ ജാമ്യം നല്കാമെന്നും ഹൈക്കോടതി ഉത്തരവില് പറയുന്നു. തെലുങ്ക് ദേശം പാര്ട്ടിയിലൂടെയാണ് നടി ജയപ്രദ രാഷ്ട്രീയത്തിലേക്ക് എത്തിയത്. പിന്നീട് സമാജ്വാദി പാര്ട്ടിയില് ചേര്ന്ന് ഉത്തര്പ്രദേശില് നിന്ന് ലോക്സഭയിലേക്കെത്തി. പാര്ട്ടി വിരുദ്ധ പ്രവര്ത്തനങ്ങളുടെ പേരില് പുറത്താക്കപ്പെട്ട ജയപ്രദ പിന്നീട് രാഷ്ട്രീയ ലോക് മഞ്ചിലും ആര്എല്ഡിയിലും ചേര്ന്നു. ആര്എല്ഡി ടിക്കറ്റില് ലോക്സഭയിലേക്ക് മത്സരിച്ചെങ്കിലും ജയിക്കാനായില്ല. 2019ല് ജയപ്രദ ബിജെപിയില് ചേർന്നു.
