യാത്രക്കാരുടെ എണ്ണത്തിൽ കുതിച്ചു ചാട്ടം; നേട്ടമുണ്ടാക്കി അദാനി വിമാനത്താവളങ്ങൾ

ന്യൂഡൽഹി ∙ കഴിഞ്ഞ വർഷം 14.25 മില്യൻ യാത്രക്കാർക്ക് സേവനം നൽകി അദാനി വിമാനത്താവളങ്ങൾ. ഇക്കാര്യത്തിൽ 100 ശതമാനം നേട്ടം കൈവരിക്കാനായെന്ന് അധികൃതർ അറിയിച്ചു. കോവിഡിനു മുൻപുണ്ടായിരുന്ന സ്ഥിതിയിലേക്ക് തിരിച്ചെത്തിയെന്നും കമ്പനി അധികൃതർ അറിയിച്ചു.അദാനിയുടെ ഏഴ് വിമാനത്താവളങ്ങളിലും ആഭ്യന്തര യാത്രക്കാരുടെ എണ്ണം 92 ശതമാനമായും രാജ്യാന്തര യാത്രക്കാരുടെ എണ്ണം 133 ശതമാനമായും ഉയർന്നു. ആഭ്യന്തര യാത്രക്കുടെ എണ്ണത്തിൽ 58 ശതമാനവും രാജ്യാന്തര യാത്രക്കാരുടെ എണ്ണത്തിൽ 61 ശതമാനവും വളർച്ചയുണ്ടായി. അദാനി എയർപോർട്ട് ഹോൾഡിങ് ലിമിറ്റഡിന്റെ (എഎഎച്ച്എൽ) ആത്മാർഥമായ സേവനവും യാത്രക്കാരുടെ സംതൃപ്തിയുമാണ് മികച്ച നേട്ടത്തിന് കാരണം.

രാജ്യത്തെ രണ്ടാമത്തെ തിരക്കേറിയ വിമാനത്താവളമായ മുംബൈ ഛത്രപതി ശിവാജി മഹാരാജ രാജ്യാന്തര വിമാനത്താവളത്തിൽ 2023 ജനുവരി–ഫെബ്രുവരി മാസങ്ങളിൽ 8.44 മില്യൻ യാത്രക്കാരെത്തി. ഇതിൽ 2.22 മില്യൻ രാജ്യാന്തര യാത്രക്കാരും 6.22 മില്യൻ ആഭ്യന്തര യാത്രക്കാരുമാണ്. സർദാർ വല്ലഭായ് പട്ടേൽ വിമാനത്താവളത്തിലും വൻ തിരക്ക് അനുഭവപ്പെട്ടു. 1.74 മില്യൻ ആഭ്യന്തര യാത്രക്കാരാണ് ഇവിടെ എത്തിയത്.

ജയ്പുർ വിമാനത്താവളത്തിൽ 0.95 മില്യൻ, ലക്നൗ ചൗധരി ചരൻ സിങ് വിമാനത്താവളത്തിൽ 1.04 മില്യൻ, നോർത്ത് ഈസ്റ്റിന്റ കവാടമായ ലോക്പ്രിയ ഗോപിനാഥ് ബോർഡോലൊയ് വിമാനത്താവളത്തിൽ 902,694, തിരുവനന്തപുരത്ത് 299,850 ആഭ്യന്തര യാത്രക്കാരും 299,770 രാജ്യാന്തര യാത്രക്കാരും എത്തി. അവധി ദിനങ്ങൾ വരുന്നതോടെ യാത്രക്കാരുടെ എണ്ണം ഇനിയും വർധിക്കുമെന്നും കമ്പനി അധികൃതർ അറിയിച്ചു.