തിരുവനന്തപുരം: പൊതുമരാമത്ത് വകുപ്പിനു കീഴിൽ ആറ് റോഡുകൾ, രണ്ട് പാലങ്ങൾ, 8 കെട്ടിടങ്ങൾ എന്നിവയ്ക്കായി 33.19 കോടി രൂപയുടെ ഭരണാനുമതി നൽകി. നേമം നിയോജകമണ്ഡലത്തിലെ തിരുമല- തൃക്കണ്ണാപുരം റോഡ് (3.8 കോടി), പാപ്പനംകോട് വിശ്വംഭരൻ റോഡ് ഒന്നാംഘട്ടം (മൂന്ന് കോടി), കാട്ടാക്കട മണ്ഡലത്തിലെ കാട്ടാക്കട ജംഗ്ഷൻ വികസനവും പൂച്ചെടിവിള- പെരുംകുളത്തൂർ റിംഗ് റോഡ് രണ്ടാംഘട്ടവും (2.76 കോടി), ഏറ്റുമാനൂർ നിയോജകമണ്ഡലത്തിലെ ആർപ്പൂക്കര- അമ്മഞ്ചേരി റോഡിൽ ഗവ. മെഡിക്കൽ കോളജിനു മുൻവശത്ത് അടിപ്പാത (1.3 കോടി), കളമശ്ശേരി നിയോജകമണ്ഡലത്തിലെ കടുങ്ങല്ലൂർ ഗ്രാമപഞ്ചായത്ത് 10, 12 വാർഡുകളിൽ ഓട (50 ലക്ഷം), ആലങ്ങാട് പഞ്ചായത്തിലെ മില്ലുപടി- അമ്പലനട റോഡ് (28 ലക്ഷം) എന്നിവയാണ് ഭരണാനുമതി നൽകിയ റോഡുകൾ.
കുന്നമംഗലം നിയോജകമണ്ഡലത്തിലെ മാമ്പുഴ പാലം പുനർനിർമാണത്തിന് 1 കോടിയുടേയും അടൂർ കെഎസ്ആർടിസി ജംഗ്ഷനിൽ കാൽനട മേൽപ്പാലം നിർമിക്കാൻ 3.55 കോടിയുടേയും ഭരണമാനുമതിയാണ് നൽകിയത്. ചങ്ങനാശ്ശേരി പോലീസ് സ്റ്റേഷൻ (3.5 കോടി), തൃപ്പൂണിത്തുറ മിനി സിവിൽ സ്റ്റേഷൻ അറ്റകുറ്റപ്പണി ( 50 ലക്ഷം), പട്ടാമ്പി ഫയർ ആൻഡ് റെസ്‌ക്യു സ്റ്റേഷൻ (മൂന്ന് കോടി), പല്ലാവൂർ ഗവ. എൽ.പി. സ്‌കൂൾ മന്ദിരം ( ഒരു കോടി), പെരുവള്ളൂർ കമ്യൂണിറ്റി ഹെൽത്ത് സെന്റർ (രണ്ട് കോടി) മഞ്ചേരി പാണ്ടിക്കാട് റെസ്റ്റ് ഹൗസ് ( അഞ്ച് കോടി), പരിയാരം കുടുംബാരോഗ്യ കേന്ദ്രം (ഒരു കോടി), കോലഞ്ചേരി കുടുംബാരോഗ്യകേന്ദ്രം ( ഒരു കോടി) എന്നിങ്ങനെയാണ് കെട്ടിടനിർമാണത്തിനുള്ള ഭരണാനുമതി.
ഭരണാനുമതി നൽകിയ പ്രവൃത്തികൾ സമയബന്ധിതമായി ആരംഭിക്കുന്നതിനുള്ള നടപടികൾ സ്വീകരിക്കുന്നതിന് ചീഫ് എഞ്ചിനീയർമാർക്ക് നിർദേശം നൽകിയതായി മന്ത്രി പി.എ മുഹമ്മദ് റിയാസ് പറഞ്ഞു.
