ലഖ്‌നൗ > ഏകദിന ലോകകപ്പില്‍ അഫ്‌ഗാനിസ്ഥാന്‌ നാലാം ജയം. നെതര്‍ലന്‍ഡ്‌സിനെ ഏഴുവിക്കറ്റിന്‌ തോല്‍പിച്ചു. ലോകകപ്പിൽ തുടർച്ചയായ മൂന്നാം ജയമാണ്‌ അഫ്‌ഗാന്റേത്‌. 180 റണ്‍സ് വിജയലക്ഷ്യം 32ാം ഓവറില്‍ മറികടന്നു. റഹ്മത്ത് ഷാ 52 റണ്‍സ് നേടി. ക്യാപ്റ്റന്‍ ഹഷ്‌മത്തുള്ള ഷാഹിദി 56 റണ്‍സുമായി പുറത്താകാതെ നിന്നു.
ടോസ് നേടി ബാറ്റിങ് തെരഞ്ഞെടുത്ത നെതര്‍ലന്‍ഡ്‌സ് 46.3 ഓവറില്‍ 179 റണ്‍സ് മാത്രമാണ് നേടിയത്. സൂപ്പര്‍താരം സൈബ്രന്‍ഡ് എന്‍ഗല്‍ബ്രക്‌ടിന്റെ അര്‍ധ സെഞ്ച്വറിയും (86 പന്തില്‍ 58), മാക്‌സ് ഒ ഡൗഡിന്റെ (40 പന്തില്‍ 42) ഇന്നിങ്‌സുമാണ് നെതർലൻഡ്‌സിനെ വമ്പന്‍ തകര്‍ച്ചയില്‍ നിന്നും കരകയറ്റിയത്. അഫ്‌ഗാനിസ്ഥാനായി മുഹമ്മദ് നബി മൂന്ന് വിക്കറ്റും, അഹമ്മദ് രണ്ടും മുജീബ് ഉര്‍ റഹ്‌മാന്‍ ഒരു വിക്കറ്റും നേടി.
