വര്‍ക്കല : അമ്മയുമായുണ്ടായ വാക്കുതര്‍ക്കത്തെത്തുടര്‍ന്ന് വാടകയ്ക്കു താമസിച്ച വീട് മകന്‍ തീയിട്ടു നശിപ്പിച്ചു. സംഭവത്തില്‍ ഈ വീട്ടില്‍ വാടകയ്ക്കു താമസിച്ചുവന്ന പ്രജിത്തി(40)നെ വര്‍ക്കല പോലീസ് അറസ്റ്റു ചെയ്തു. വര്‍ക്കല അയന്തി വലിയമേലതില്‍ ക്ഷേത്രത്തിനു സമീപമുള്ള വീടിനാണ് തീയിട്ടത്. വര്‍ക്കല മേല്‍വെട്ടൂര്‍ സ്വദേശികളായ പ്രസന്നന്‍-ബീന ദമ്പതിമാരുടെ ഉടമസ്ഥതയിലുള്ളതാണ് വീട്. വീടിനുള്ളിലെ ഫര്‍ണീച്ചറും ഇലക്ട്രിക് ഉപകരണങ്ങളും കത്തിനശിക്കുകയും ഭിത്തികള്‍ പൊട്ടിയടര്‍ന്നുമാറുകയും ചെയ്തു. 12 ലക്ഷം രൂപയുടെ നഷ്ടമുണ്ടായതായാണ് വിലയിരുത്തല്‍. കഴിഞ്ഞദിവസം രാത്രിയാണ് സംഭവം. മദ്യലഹരിയിലെത്തിയ പ്രജിത്ത് ഒമ്പതു വയസുള്ള മകനുമായി പുറത്തേക്കു പോകാന്‍ ഇറങ്ങിയപ്പോള്‍ അമ്മ സതി തടഞ്ഞു. ഇതോടെ ഇരുവരും തമ്മില്‍ വലിയ വാക്കേറ്റമുണ്ടായി. തുടര്‍ന്ന് ചെറുമകനുമായി സമീപത്തുള്ള ക്ഷേത്രോത്സവത്തില്‍ പങ്കെടുക്കാനായി സതി പോയി. ഇതില്‍ പ്രകോപിതനായ പ്രജിത്ത് വീടിനു തീയിടുകയായിരുന്നു. തീ ആളിപ്പടരുന്നതുകണ്ട് പ്രദേശവാസികള്‍ തീയണയ്ക്കാനുള്ള ശ്രമം നടത്തി. പിന്നീട് അഗ്നിരക്ഷാസേന സ്ഥലത്തെത്തി തീയണച്ചു.
