ദില്ലി: ബോര്ഡര്- ഗവാസ്കര് ട്രോഫിയിലെ രണ്ടാം ടെസ്റ്റില് ഇന്ത്യക്കെതിരെ ഓസ്ട്രേലിയ ആദ്യം ബാറ്റ് ചെയ്യും. ദില്ല, അരുണ് ജെയ്റ്റ്ലി സ്റ്റേഡിയത്തില് ടോസ് നേടിയ ഓസ്ട്രേലിയന് ക്യാപ്റ്റന് പാറ്റ് കമ്മിന്സ് ബാറ്റിംഗ് തിരഞ്ഞെടുക്കുകയായിരുന്നു. നാഗ്പൂരില് കളിച്ച ടീമില് മാറ്റങ്ങളുമായിട്ടാണ് ഇരുവരും ഇറങ്ങുന്നത്. ഓസീസ് ടീമില് ഇടങ്കയ്യന് സ്പിന്നര് മാത്യു കുനെമാന് അരങ്ങേറ്റം നടത്തും. സ്കോട്ട് ബോളണ്ട് വഴിമാറി കൊടുത്തു. മാറ്റ് റെന്ഷ്വൊക്ക് പകരം ട്രാവിസ് ഹെഡ് ടീമിലെത്തി.
അതേസമയം, ദില്ലിയില് കളിക്കുമെന്ന് പ്രതീക്ഷിച്ചിരുന്ന കാമറൂണ് ഗ്രീന്, മിച്ചല് സ്റ്റാര്ക്ക് എന്നിവര്ക്ക് തിരിച്ചുവരാനായില്ല. പരിക്ക് മാറിയെങ്കിലും 100 ശതമാനം കായികക്ഷമത വീണ്ടെടുത്തിട്ടില്ലെന്നാണ് വിവരം. മുന്ന് സ്പെഷ്യലിസ്റ്റ് സ്പിന്നര്മാരാണ് ഓസീസ് ടീമിലുള്ളത്. കുനെമാന് പുറമെ നാഗ്പൂരില് അരങ്ങേറ്റ ടെസ്റ്റില് ഏഴ് വിക്കറ്റ് വീഴ്ത്തിയ ടോഡ് മര്ഫി, സീനിയര് സ്പിന്നര് നതാന് ലിയോണ് എ്ന്നിവരും ടീമിലുണ്ട്.
ഇന്ത്യന് ടീം ഒരു മാറ്റമാണ് വരുത്തിയത്. അരങ്ങേറ്റ ടെസ്റ്റില് മോശം പ്രകടനം നടത്തിയ സൂര്യകുമാര് യാദവ് പുറത്തായി. പരിക്ക് മാറിയ ശ്രേയസ് അയ്യര് തിരിച്ചെത്തി. നാല് മത്സരങ്ങളുടെ പരമ്പരയില് ഇന്ത്യ 1-0ത്തിന് മുന്നിലാണ്. നാഗ്പൂര് ടെസ്റ്റില് ഇന്ത്യ ഇന്നിംഗ്സ് ജയം സ്വന്തമാക്കിയിരുന്നു.
ഇന്ത്യ: രോഹിത് ശര്മ, കെ എല് രാഹുല്, ചേതേശ്വര് പൂജാര, വിരാട് കോലി, ശ്രേയസ് അയ്യര്, രവീന്ദ്ര ജഡേജ, കെ എസ് ഭരത്, അക്സര് പട്ടേല്, ആര് അശ്വിന്, മുഹമ്മദ് ഷമി, മുഹമ്മദ് സിറാജ്.
ഓസ്ട്രേലിയ: ഡേവിഡ് വാര്ണര്, ഉസ്മാന് ഖവാജ, മര്നസ് ലബുഷെയ്ന്, സ്റ്റീവന് സ്മിത്ത്, ട്രാവിസ് ഹെഡ്, പീറ്റര് ഹാന്ഡ്കോംപ്, അലക്സ് ക്യാരി, മാത്യു പാറ്റ് കമ്മിന്സ്, മാത്യു കുനെമാന്, ടോഡ് മര്ഫി, നതാന് ലിയോണ്.
