മെല്ബണ് : നൊവാക് ജോക്കോവിച്ചിന് പിന്നാലെ ചെക് റിപ്പബ്ലിക്കിന്റെ വനിതാ താരത്തിന്റെയും വിസ റദ്ദാക്കി ഓസ്ട്രേലിയ. ഓസ്ട്രേലിയന് ഓപ്പണിനായി എത്തിയ റെനാറ്റ വൊറാക്കോവയുടെ വീസ ആണ് റദ്ദാക്കിയത്. കൊവിഡ് വാക്സീന് എടുക്കാത്ത റെനാറ്റയും പ്രത്യേക ഇളവിനായി അപേക്ഷിച്ചിരുന്നു. ജോക്കോവിച്ചിനെ താമസിപ്പിച്ചിരിക്കുന്ന നിരീക്ഷണ കേന്ദ്രത്തിലാണ് റെനാറ്റ ഇപ്പോള്. എന്നാല് ഇവര് അപ്പീല് നല്കുമോയെന്ന് വ്യക്തമല്ല. ഈ മാസം 17 മുതലാണ് ഓസ്ട്രേലിയന് ഓപ്പണ്. ടൂര്ണമെന്റില് പങ്കെടുക്കുന്നവര് രണ്ട് ഡോസ് വാക്സീന് എടുത്തിരിക്കണമെന്നാണ് ചട്ടം. വാക്സീന് എടുക്കാന് പറ്റാത്ത ആരോഗ്യപരമായ പ്രശ്നങ്ങളുള്ളവര്ക്ക് ഇളവ് നല്കും. ഈ ഇളവ് തനിക്ക് ലഭിച്ചെന്ന് അവകാശപ്പെട്ടായിരുന്നു വാക്സീന് വിരുദ്ധനായ ലോക ഒന്നാം നമ്പര് താരം നൊവാക് ജോക്കോവിച്ച് ഇന്നലെ ഉച്ചയോടെ ഓസ്ട്രേലിയയിലെ മെല്ബണിലെത്തിയത്.
വിമാനത്താവളത്തില് എത്തിയപാടെ ജോക്കോവിച്ചിനെ സുരക്ഷാ സേന തടഞ്ഞു. കൊവിഡ് വ്യാപനം രൂക്ഷമായ ഓസ്ട്രേലിയയില് ആര്ക്കും ഇളവ് നല്കാനാകില്ലെന്ന് വ്യക്തമാക്കി. ജോക്കോവിച്ചിനെ 15 മണിക്കൂറിലധികം മെല്ബണ് വിമാനത്താവളത്തില് തടഞ്ഞുവെച്ചിരുന്നു. തുടര്ന്ന് സൂപ്പര്താരത്തെ സര്ക്കാരിന്റെ നിയന്ത്രണത്തിലുള്ള ഹോട്ടലിലേക്ക് മാറ്റുകയായിരുന്നു.
