തൃപ്രയാർ : രണ്ടിടങ്ങളിൽ നടത്തിയ പരിശോധനയിൽ 4.5 ഗ്രാം ലഹരിമരുന്നുമായി രണ്ട് യുവാക്കളെ എക്സൈസ് സംഘം അറസ്റ്റ് ചെയ്തു.കോട്ടപ്പുറം ഇരിങ്ങപ്പുറം കന്നിമേൽ കിഴക്കേതിൽ വീട്ടിൽ വിവേക് (22), കുന്നംകുളം ആർത്താറ്റ് കൊണ്ടറപ്പശ്ശേരി വീട്ടിൽ വിഷ്ണു (25) എന്നിവരാണ് അറസ്റ്റിലായത്. എക്സൈസ് വാടാനപ്പള്ളി റെയ്ഞ്ച് ഇൻസ്പെക്ടർ എസ്.എസ്. സച്ചിന്റെ നേതൃത്വത്തിലാണ് പ്രതികളെ അറസ്റ്റ് ചെയ്തത്. ചേറ്റുവ ഭാഗത്ത് നടത്തിയ പരിശോധനയിൽ 1.05 ഗ്രാം എംഡിഎംഎയുമായി വിവേകാണ് ആദ്യം പിടിയിലായത്. ഇയാളെ കസ്റ്റഡിയിലെടുത്ത് ചോദ്യംചെയ്തപ്പോഴാണ് അടുത്ത പ്രതിയെക്കുറിച്ച് സൂചന ലഭിച്ചത്.
തുടർന്നുള്ള അന്വേഷണത്തിൽ ആർത്താറ്റ് എസ്ബിഐ ബ്രാഞ്ചിന് സമീപം നിർത്തിയിട്ട ഓട്ടോയിൽനിന്ന് 3.45 ഗ്രാം എംഡിഎംഎയുമായി വിഷ്ണുവും പിടിയിലായി.
വിഷ്ണുവും വിവേകും ഓട്ടോയിൽ കറങ്ങിയാണ് മരുന്ന് വിൽപ്പന നടത്തിയിരുന്നതെന്ന് എക്സൈസ് അധികൃതർ പറഞ്ഞു. പ്രതികൾ ഉപയോഗിച്ച ഓട്ടോ എക്സൈസ് സംഘം കസ്റ്റഡിയിലെടുത്തു. പ്രിവെന്റീവ് ഓഫീസർമാരായ എ.ബി. സുനിൽകുമാർ, ഹരിദാസ്, സിവിൽ എക്സൈസ് ഓഫീസർമാരായ ജെയ്സൻ, രതീഷ്കുമാർ, ഉണ്ണികൃഷ്ണൻ, അഫ്സൽ എന്നിവരും അന്വേഷണസംഘത്തിൽ ഉണ്ടായിരുന്നു.
