പട്ന: റെയിൽവേയിലെ മലയാളി ബാസ്ക്കറ്റ് ബോൾ താരം കെ.സി.ലിതാരയുടെ (23) ദുരൂഹ സാഹചര്യത്തിലെ ആത്മഹത്യാ സംഭവത്തിൽ ദേശീയ മനുഷ്യാവകാശ കമ്മിഷൻ കേസെടുത്തു. വടകര വട്ടോളി കത്തിയണപ്പൻ ചാലിൽ കണാരന്റെ മകളായ ലിതാരയെ ഏപ്രിൽ 26നാണ് പട്നയിലെ ഫ്ലാറ്റിനുള്ളിൽ ആത്മഹത്യ ചെയ്ത നിലയിൽ കണ്ടെത്തിയത്.
ലിതാരയുടെ കോച്ച് രവി സിങ്ങിനെതിരെ ആത്മഹത്യാ പ്രേരണ കുറ്റത്തിനു രാജീവ് നഗർ പൊലീസ് സ്റ്റേഷനിൽ എഫ്ഐആർ റജിസ്റ്റർ ചെയ്തെങ്കിലും ഇതുവരെ അറസ്റ്റ് ഉണ്ടായിട്ടില്ല. രവി സിങ് ഒളിവിലാണെന്നാണ് പൊലീസിന്റെ ഭാഷ്യം. കോച്ച് രവി സിങ്ങിനെ റെയിൽവേ ജോലിയിൽനിന്നു സസ്പെൻഡ് ചെയ്തിരുന്നു.
ലിതാരയുടെ മരണത്തെ കുറിച്ചു മുതിർന്ന ഐപിഎസ് ഉദ്യോഗസ്ഥൻ അന്വേഷിക്കണമെന്നും ലിതാരയുടെ കുടുംബത്തിനു അർഹമായ നഷ്ടപരിഹാരം നൽകണമെന്നും ആവശ്യപ്പെട്ട് എൽജെഡി സംസ്ഥാന ജനറൽ സെക്രട്ടറി സലിം മടവൂർ നൽകിയ പരാതിയുടെ അടിസ്ഥാനത്തിലാണു ദേശീയ മനുഷ്യാവകാശ കമ്മിഷൻ കേസ് റജിസ്റ്റർ ചെയ്തത്. ലിതാരയുടെ കുടുംബത്തിനു 15 ലക്ഷത്തോളം രൂപയുടെ കടബാധ്യതയുള്ളതിനാൽ റെയിൽവേ ഉചിതമായ നഷ്ടപരിഹാരം നൽകണമെന്നു പരാതിയിൽ ആവശ്യപ്പെട്ടിട്ടുണ്ട്. ദേശീയ മനുഷ്യാവകാശ കമ്മിഷനിൽ കേസ് ഈയാഴ്ച തന്നെ പരിഗണിച്ചേക്കും.
