മാഡ്രിഡ് : സ്പാനിഷ് ക്ലബിന്റെ പരിശീലകനാവാന്‍ താല്‍പര്യമുണ്ടെന്ന് അര്‍ജന്റൈന്‍ കോച്ച് ലിയോണല്‍ സ്‌കലോണി. ഭാവിയില്‍ തന്റെ ആഗ്രഹം സഫലമാവുമെന്നാണ് പ്രതീക്ഷയെന്നും സ്‌കലോണി പറഞ്ഞു. അര്‍ജന്റീനയുടെ തലവര മാറ്റിയ പരിശീലകനാണ് ലിയോണല്‍ സ്‌കലോണി. തുടര്‍തിരിച്ചടികളില്‍ നട്ടംതിരിഞ്ഞ അര്‍ജന്റീനയെ അപരാജിതരാക്കിയ സ്‌കലോണി ഒരുവര്‍ഷത്തിനിടെ രണ്ട് കിരീടങ്ങളും ടീമിന് സമ്മാനിച്ചു.
കോപ്പ അമേരിക്കയിലും ഫിനലിസിമയിലും കിരീടം നേടിയ ലിയോണല്‍ മെസിയും സംഘവും അവസാന മുപ്പത്തിമൂന്ന് കളിയില്‍ തോല്‍വിയറിഞ്ഞിട്ടില്ല. അര്‍ജന്റൈന്‍ ടീമിന്റെ ചുമതലയൊഴിഞ്ഞാല്‍ ഏത് ടീമിനെ പരിശീലിപ്പിക്കുമെന്ന ചോദ്യത്തിനാണ് സ്‌കലോണി തന്റെ ഒളിപ്പിച്ചുവച്ചമോഹം വെളിപ്പെടുത്തിയത്. മുന്‍പ് താന്‍ കളിച്ചിട്ടുള്ള സ്പാനിഷ് ക്ലബ് ഡിപ്പോര്‍ട്ടീവോ ലാ കൊരുണയുടെ പരിശീലകനാവണമെന്നാണ് സ്‌കലോണിയുടെ ആഗ്രഹം.
ഇപ്പോള്‍ രണ്ടാം ഡിവിഷനില്‍ കളിക്കുന്ന ഡിപ്പോര്‍ട്ടീവോ ലാ ലീഗയിലേക്ക് സ്ഥാനക്കയറ്റം നേടാനുള്ള തീവ്രശ്രമത്തിലാണ്. ഡിപ്പോര്‍ട്ടീവോയ്ക്ക് പൂര്‍ണ പിന്തുണ അറിയിച്ച സ്‌കലോണി തന്റെ വളര്‍ച്ചയില്‍ നിര്‍ണായക പങ്കുവഹിച്ച ക്ലബിനെ സഹായിക്കുമെന്നും ഉറപ്പുനല്‍കി.
1998 മുതല്‍ 2006 വരെ ഡിപ്പോര്‍ട്ടീവോ ലാ കൊരൂണയുടെ താരമായിരുന്ന സ്‌കലോണി ക്ലബിനായി ഇരുനൂറ് മത്സരങ്ങളില്‍ കളിച്ചിട്ടുണ്ട്. ഡിപ്പോര്‍ട്ടീവോ 1999-.2000 സീസണില്‍ ലാ ലീഗ കിരീടം നേടിയപ്പോള്‍ നിര്‍ണായക സാന്നിധ്യമായിരുന്നു പ്രതിരോധ താരമായിരുന്ന ലിയോണല്‍ സ്‌കലോണി.
