കൊൽക്കത്ത > ബാംഗാളിൽ രാഹുൽ ഗാന്ധി നയിക്കുന്ന ഭാരത് ജോഡോ ന്യായ് യാത്രയ്‌ക്കുനേരെ കരിങ്കൊടികാട്ടി തൃണമൂൽ കോൺഗ്രസ്‌. രണ്ടുദിവസത്തെ ഇടവേളയ്ക്കുശേഷം ഞായറാഴ്‌ച സിലിഗുരിയിൽനിന്ന്‌ യാത്ര ആരംഭിച്ചപ്പോഴാണ്‌ പോസ്റ്ററുകളടക്കം ഉയർത്തി പ്രതിഷേധം. ബംഗാളിൽ ബിജെപിയെ നേരിടാൻ മമത മതിയെന്നും രാഹുൽ മറ്റു സ്ഥലങ്ങളിലേക്ക് പോകണമെന്നുമാണ്‌ ആവശ്യം.
ഇന്ത്യ കൂട്ടായ്‌മ ശക്തിപ്പെടുത്താൻ കോൺഗ്രസിനാകില്ലെന്നും ബിഹാർ പലയിടത്തും ആവർത്തിക്കുമെന്നും നേതാക്കൾ പ്രതികരിച്ചു. പൊതുയോഗങ്ങൾക്ക് പലയിടങ്ങളിലും അനുമതി നിഷേധിച്ചു. ന്യായ് യാത്ര കടന്നുപോകുന്ന പ്രദേശങ്ങളിലൂടെ മമത ബാനർജിയുടെ നേതൃത്വത്തിൽ തൃണമൂൽ ജാഥയ്‌ക്കും തിങ്കളാഴ്‌ച തുടക്കം കുറിച്ചു. തെരഞ്ഞെടുപ്പിൽ കോൺഗ്രസുമായി സംഖ്യത്തിനില്ലെന്ന്‌ മമത ആവർത്തിച്ചു. അതേസമയം, രാഹുലിന്റെ യാത്രയെ ഇടതുപക്ഷ പാർടികൾ പിന്തുണച്ചു.
