ലഖ്‌നൗ: ഉത്തര്‍പ്രദേശില്‍ ബൈക്ക് സ്റ്റണ്ട് ചെയ്യുന്ന വീഡിയോ ഇന്‍സ്റ്റാഗ്രാമില്‍ പോസ്റ്റ് ചെയ്ത പോലീസ് ഉദ്യോഗസ്ഥന് സസ്പെന്ഷന്. കോണ്‍സ്റ്റബിള്‍ സന്ദീപ് കുമാര്‍ ചൗബേയ്ക്കെതിരെയാണ് നടപടി. വീഡിയോ സോഷ്യല്‍ മീഡിയയില്‍ വ്യാപകമായി പ്രചരിച്ചതിന് പിന്നാലെയാണ് സസ്പെന്ഷന്. വീഡിയോയെക്കുറിച്ച് പരാതി ലഭിച്ചതിനെത്തുടര്‍ന്ന് സീനിയര്‍ പോലീസ് സൂപ്രണ്ട് (എസ്എസ്പി) അന്വേഷണം ആരംഭിച്ചു.
ഗോരഖ്പൂരില്‍ ജോലി ചെയ്യുന്ന സന്ദീപ് കുമാര്‍ ചൗബെ യൂണിഫോം ധരിച്ചാണ് ബൈക്കില്‍ അഭ്യാസപ്രകടനം നടത്തിയത്. ‘ശത്രുക്കളെ നിനക്ക് പേടിയില്ലേ’ എന്ന് ഒരു പെണ്‍കുട്ടി ചോദിക്കുന്ന ഡയലോഗ് ഉള്‍പ്പെടുത്തിയാണ് വീഡിയോ. ‘ശത്രുക്കളെ എന്തിന് ഭയപ്പെടുന്നു…എന്താണ് മരണം…ഇന്നല്ലെങ്കില്‍ നാളെ നമ്മള്‍ മരിക്കും. നിങ്ങള്‍ക്ക് ഭയമുണ്ടെങ്കില്‍ ദൈവത്തെ ഭയപ്പെടണം.. എന്തിനാണ് പ്രാണികളെയും ചിലന്തികളെയും ഭയപ്പെടുന്നത്?’ എന്നും വീഡിയോയില്‍ പറയുന്നു. പോലീസ് ഉദ്യോഗസ്ഥരെ സ്വകാര്യ ഫോട്ടോകളോ വീഡിയോകളോ സോഷ്യല്‍ മീഡിയയില്‍ പോസ്റ്റ് ചെയ്യുന്നതില്‍ നിന്ന് വിലക്കി 2023 ഫെബ്രുവരി 8 ന് യുപി പോലീസ് ഉത്തരവിറക്കിയിരുന്നു.
