കൊച്ചി : സമൂഹമാധ്യമത്തിലൂടെ മതനിന്ദ നടത്തിയെന്ന കേസിൽ സ്വർണക്കടത്തു കേസ് പ്രതി സ്വപ്ന സുരേഷിന്റെ അഭിഭാഷകൻ ആർ.കൃഷ്ണരാജിന് മുൻകൂർ ജാമ്യം. എറണാകുളം പ്രിൻസിപ്പൽ സെഷൻസ് കോടതിയാണ് ജാമ്യം അനുവദിച്ചത്. കെഎസ്ആർടിസി ബസ് ഡ്രൈവറുടെ ചിത്രം ഉപയോഗിച്ച് സമൂഹമാധ്യമത്തിലൂടെ ഒരു മതത്തെ അപകീർത്തിപ്പെടുത്താൻ ശ്രമിച്ചെന്ന പരാതിയിൽ എറണാകുളം സെൻട്രൽ പൊലീസാണ് കേസ് എടുത്തത്.
മതനിന്ദ വകുപ്പു ചേർത്തായിരുന്നു കേസ് എന്നതിനാലാണ് മുൻകൂർ ജാമ്യാപേക്ഷയുമായി കോടതിയെ സമീപിച്ചത്. സ്വപ്ന സുരേഷിനു വേണ്ടി കോടതിയിൽ ഹാജരായതിനുള്ള പ്രതികാര നടപടിയാണ് കേസിനു പിന്നിലെ താൽപര്യമെന്നായിരുന്നു അഭിഭാഷകന്റെ വാദം. താൻ ഒരു മതത്തെയും നിന്ദിച്ചിട്ടില്ലെന്നും തനിക്കു സമൂഹമാധ്യമത്തിൽനിന്നു ലഭിച്ച ചിത്രം പങ്കുവയ്ക്കുക മാത്രമാണ് ചെയ്തതെന്നുമായിരുന്നു കൃഷ്ണരാജിന്റെ നിലപാട്.
