വളയം (കോഴിക്കോട്) ∙ ചെറുമോത്ത് ഒപി മുക്കിൽ ഇടവഴിയിൽ രാത്രി സ്ഫോടനം. സ്റ്റീൽ ബോംബെറിഞ്ഞതാണെന്നാണ് അനുമാനം. പൊലീസും ബോംബ് സ്ക്വാഡും പരിശോധന നടത്തി. സ്ഫോടനം നടന്ന സ്ഥലത്ത് മണ്ണിളകിയ നിലയിലാണ്. അവശിഷ്ടങ്ങൾ പൊലീസ് കസ്റ്റഡിയിലെടുത്തു.
ദിവസങ്ങൾക്കു മുൻപ് വിവാഹ വീടിനു സമീപം സ്റ്റീൽ ബോംബേറുണ്ടായതു സംബന്ധിച്ച് പൊലീസ് അന്വേഷണം നടത്തിക്കൊണ്ടിരിക്കുന്നതിനിടയിലാണ് വീണ്ടും സ്ഫോടനമുണ്ടായത്. വീര്യം കുറഞ്ഞ സ്ഫോടകവസ്തു ആരോ പേടിപ്പെടുത്താനായി പ്രയോഗിച്ചതാണെന്നാണ് പൊലീസ് കരുതുന്നത്. അന്വേഷണം ആരംഭിച്ചിട്ടുണ്ട്.
