ബ്രസീലിയ∙ ബ്രസീലിയൻ ഇൻസ്റ്റഗ്രാം ഇൻഫ്ലുവന്‍സര്‍ നുബിയ ക്രിസ്റ്റീന ബ്രാഗ(23)യെ വീട്ടിനുള്ളിൽ അതിക്രമിച്ചു കടന്ന അജ്ഞാതരായ അതിക്രമികൾ വെടിവച്ചു കൊന്നു. ഒക്ടോബർ 14 ന് രാത്രി ബ്രസീലിലെ സെർഗിപെ സംസ്ഥാനത്തിലെ അറക്കാജുവിൽ സാന്താ മരിയയ്ക്ക് സമീപമുള്ള വീട്ടിലാണ് നുബിയ ക്രിസ്റ്റീനയെ കൊല്ലപ്പെട്ട നിലയിൽ കണ്ടെത്തിയത്. ബ്രസീലിലെ അറിയപ്പെടുന്ന ഇൻസ്റ്റഗ്രാം ഇൻഫ്ലുവന്‍സറായ ക്രിസ്റ്റീനയ്ക്ക് 60,000 ത്തോളം ഇൻസ്റ്റാഗ്രാം ഫോളോവേഴ്‍സ് ഉണ്ട്. ഒക്ടോബർ 14 ന് രാത്രി സലൂണിൽ പോയി വന്നതിനു പിന്നാലെയാണ് കൊലപാതകം നടന്നതെന്നും, മോട്ടോർ സൈക്കിളിൽ വന്ന അക്രമികൾ മുൻവശത്തെ ഗേറ്റ് വഴിയാണ് വീട്ടുവളപ്പിൽ പ്രവേശിച്ചതെന്നും രാജ്യാന്തര മാധ്യമം റിപ്പോർട്ട് ചെയ്യുന്നു. നുബിയയ്‌ക്കെതിരെ വെടിയുതിർത്ത ശേഷം മുഖംമൂടി ധാരികളായ അക്രമികൾ മോട്ടോർ സൈക്കിളിൽ രക്ഷപ്പെട്ടതായും റിപ്പോർട്ടിൽ പറയുന്നു. രാത്രി 9 മണിയോടെ പൊലീസ് എത്തുമ്പോൾ നുബിയ രക്തത്തിൽ കുളിച്ച് കിടക്കുകയായിരുന്നു. അക്രമികളെ കുറിച്ച് നിലവിൽ യാതൊരു തരത്തിലുള്ള സൂചനയും ലഭിച്ചിട്ടില്ലെന്നു പൊലീസ് പറയുന്നു. നുബിയ ക്രിസ്റ്റീനയ്ക്ക് യാതൊരു തരത്തിലുള്ള ഭീഷണിയും ഇല്ലായിരുന്നുവെന്നു ബന്ധുക്കൾ മാധ്യമങ്ങളോട് പ്രതികരിച്ചു.
