കൊച്ചി: കോതമംഗലം വടാട്ടുപാറയിൽ കർഷകന്റെ പോത്തിനെ കാട്ടാന കുത്തിയും ചവട്ടിയും കൊന്നു. പനഞ്ചോട് തുമ്പനിരപ്പേൽ ജോസിന്റെ പുരയിടത്തിൽ കെട്ടിയിട്ടിരുന്ന ഒരു വയസ്സ് പ്രായമുള്ള പോത്തിനെയാണ് കാട്ടാന ആക്രമിച്ചു കൊന്നത്. ഇന്നു പുലർച്ചെ രണ്ടുമണിയോടെയാണ് സംഭവം. പോത്തിന്റെ കരച്ചിൽ കേട്ട് വീട്ടുകാർ ഇറങ്ങി നോക്കിയപ്പോൾ ആന ആക്രമിക്കുന്നതു കണ്ടു ബഹളമുണ്ടാക്കിയെങ്കിലും ആന പിന്തിരിഞ്ഞില്ല. മണിക്കൂറുകൾ പ്രദേശത്തു തമ്പടിച്ച ശേഷമാണ് ആന കാട്ടിലേക്കു തിരിച്ചു കയറിയത്. ഇവിടെ കാട്ടാനക്കൂട്ടം കൃഷിഭൂമി നശിപ്പിക്കുന്നതു പതിവു സംഭവമാണ്. ഇതിനെതിരെ നിരവധി തവണ പരാതി നൽകിയിട്ടും ഫലമുണ്ടായിട്ടില്ല. ഫെൻസിങ് സ്ഥാപിച്ചിട്ടില്ലാത്തതിനാൽ വന്യജീവി ശല്യം രൂക്ഷമാണ്.വന്യജീവികൾ കൃഷി നശിപ്പിക്കുന്നതിനെതിരെ പ്രദേശവാസികൾ പ്രക്ഷോഭം ഉയർത്തിയിട്ടും അധികൃതരിൽനിന്നു കാര്യമായ പ്രതികരണം ഉണ്ടായിട്ടില്ലെന്നു കുട്ടമ്പുഴ രണ്ടാം വാർഡ് പഞ്ചായത്ത് അംഗം എൽദോസ് പറഞ്ഞു.
