കണ്ണൂർ : സി.പി.എം പാർട്ടി കോൺഗ്രസ് വേദി നിർമാണത്തിനെതിരെ വീണ്ടും കന്റോൺമെന്റ് ബോർഡ്. നിർമ്മാണം ചട്ട വിരുദ്ധമെന്ന് കാണിച്ച് വീണ്ടും നോട്ടീസ് നൽകി. താൽക്കാലിക നിർമാണത്തിന്റെ പേരിൽ സ്ഥിര നിർമാണം നടത്തുന്നു എന്നാണ് കന്റോൺമെന്റ് ബോർഡ് പറയുന്നത്. പാർട്ടി കോൺഗ്രസിനുവേണ്ടി നായനാർ അക്കാദമിയിൽ താൽക്കാലിക കെട്ടിടമാണ് നിർമിക്കുന്നത്. ഇത് നിയമവിരുദ്ധമാണെന്നും പണി നിർത്തിവെക്കണമെന്നും പൊളിച്ചു മാറ്റാതിരിക്കാൻ കാരണം എന്തെങ്കിലും ഉണ്ടെങ്കിൽ അറിയിക്കണമെന്നും കാണിച്ച് കന്റോൺമെന്റ് ബോർഡ് നേരത്തെ നോട്ടീസ് നൽകിയിരുന്നു. ഇതിന് നായനാർ അക്കാദമി അധികൃതർ മറുപടി നൽകുകയും ചെയ്തു. എന്നാൽ ഈ മറുപടിയിൽ തൃപ്തികരമല്ലെന്ന് അറിയിച്ചു കൊണ്ടാണ് വീണ്ടും നോട്ടീസ് അയച്ചിരിക്കുന്നത്.
കന്റോൺമെന്റ് ആക്ടിലെ സെക്ഷൻ 248 പ്രകാരമാണ് നോട്ടീസ് അയച്ചിട്ടുള്ളത്. നിർമാണ പ്രവർത്തനങ്ങൾ അംഗീകരിക്കണമെന്നുണ്ടെങ്കിൽ പ്രവൃത്തിക്ക് ചെലവായ തുകയുടെ 20 ശതമാനം മുൻകൂറായി കെട്ടിവെക്കണം എന്ന വ്യവസ്ഥ ഉൾപ്പെടെ ചൂണ്ടിക്കാട്ടിയാണ് വീണ്ടും നോട്ടീസ് അയച്ചിരിക്കുന്നത്. ഒരു മാസത്തിനകം മറുപടി നൽകണമെന്നും വ്യക്തമാക്കുന്നുണ്ട്.
