കോട്ടയം> ഉമ്മൻചാണ്ടിയുടെ ചികിത്സാവിവാദം കോവിഷീൽഡിന്റെ പാർശ്വഫലങ്ങളെ കുറിച്ചുള്ള വാർത്തകൾക്കിടെ വീണ്ടും ചർച്ചയാക്കി മകൻ ചാണ്ടി ഉമ്മൻ എംഎൽഎ. കോവിഡ് സമയത്ത് രാജ്യം മുഴുവൻ സ്വീകരിച്ചിരുന്ന വാക്സിൻ പിതാവിന് നൽകിയിരുന്നില്ലെന്ന് എം എൽ എ ഫെയ്സ് ബുക്ക് ലൈവിൽ പറയുന്നു.
ഉമ്മൻചാണ്ടിയുടെ ആരോഗ്യത്തിന് ദോഷം വരാതിരിക്കാനാണ് അദ്ദേഹത്തിന് കൊവിഡ് വാക്സിൻ നൽകാതിരുന്നതെന്നാണ് ലൈവിൽ ന്യായീകരിക്കുന്നത്. മുൻ മുഖ്യമന്ത്രിയും കോൺഗ്രസ് നേതാവുമായ ഉമ്മൻ ചാണ്ടിക്ക് ശാസ്ത്രീയ ചികിത്സ നിഷേധിക്കുന്നു എന്ന വാർത്ത വലിയ വിവാദമായിരുന്നു. പ്രാർത്ഥനയും മറ്റുമായി ചികിത്സ നിഷേധിക്കയാണെന്ന് കുടുംബത്തിനകത്ത് നിന്നു തന്നെ എതിർപ്പ് ഉണ്ടായി.
വാക്സിന്റെ അപൂർവ്വ സാധ്യതയുള്ള പാർശ്വ ഫലങ്ങളുമായി ബന്ധപ്പെട്ട വാർത്തകളുടെ പശ്ചാത്തലത്തിലാണ് ഇപ്പോൾ മകൻ ചാണ്ടി ഉമ്മൻ്റെ വിശദീകരണം. ഉമ്മൻചാണ്ടിക്ക് ചികിത്സ നിഷേധിച്ചുവെന്ന് പരക്കെ ആക്ഷേപം ഉയർന്നിരുന്നു. അദ്ദേഹത്തിന് മരുന്ന് നൽകിയില്ലെന്ന് വരെ പറഞ്ഞു പരത്തി. എന്നാൽ ഇതായിരുന്നില്ല യാഥാർത്ഥ്യം എന്നാണ് ഫേസ്ബുക്ക് ലൈവിൽ അറിയിക്കുന്നത്. .
കൊവിഡ് വാക്സീൻ നൽകിയിരുന്നില്ല. മറ്റെല്ലാ ചികിത്സകളും ഉമ്മൻചാണ്ടിക്ക് നൽകി. അദ്ദേഹത്തിന് ദോഷം വരുന്നതൊന്നും ചെയ്യരുതെന്ന് കരുതിയാണ് വാക്സീൻ നൽകാതിരുന്നത്. ഇത് പൊതുജനങ്ങളെ അറിയിക്കേണ്ട ബാധ്യതയുണ്ടെന്നും ചാണ്ടി ഉമ്മൻ വ്യക്തമാക്കി.
ഇന്ത്യയിൽ കൊവിഷീൽഡ് എന്ന പേരിൽ അവതരിപ്പിച്ച കൊവിഡ് വാക്സിന് അപൂർവ്വമായി ഗുരുതര പാർശ്വഫലം കാണിച്ചിട്ടുള്ളതായി വാക്സിൻ കമ്പനി ആസ്ട്രസെനെക യുകെ കോടതിയിൽ സമ്മതിച്ചിരുന്നു.
വാക്സീനെടുത്ത അപൂർവ്വം ചിലരിൽ രക്തം കട്ടപിടിക്കുകയും, പ്ലേറ്റ്ലെറ്റ് കൗണ്ട് കുറയ്ക്കുകയും ചെയ്യുന്ന ടിടിഎസ് (ത്രോംന്പോസിസ് വിത്ത് ത്രോന്പോസൈറ്റോപ്പീനിയ) എന്ന അവസ്ഥയുണ്ടാകാമെന്നാണ് കമ്പനി സമ്മതിച്ചത്. യുകെ ഹൈക്കോടതിയിൽ ഫെബ്രുവരിയിൽ സമർപ്പിച്ച സത്യവാങ്മൂലത്തിലാണ് ഇത് വ്യക്തമാക്കിയിരിക്കുന്നത്.
വാക്സീനെടുത്തതിന് പിന്നാലെ തലച്ചോറിൽ രക്തം കട്ടപിടിച്ച് ആശുപത്രിയിലായ ബ്രിട്ടിഷ് സ്വദേശിയായ നാൽപ്പത്തിനാലുകാരൻ നൽകിയ കേസിലാണ് കമ്പനി സത്യവാങ്മൂലം സമർപ്പിച്ചത്. ഇന്ത്യയിൽ സിറം ഇൻസ്റ്റിറ്റ്യൂട്ടുമായി ചേർന്നാണ് ആസ്ട്രസെനക കൊവിഷീൽഡ് വാക്സീൻ അവതരിപ്പിച്ചത്.
കോവാക്സിനും കോവിഷീൽഡുമാണ് ഇന്ത്യയിൽ പരക്കെ സർക്കാർ സഹായത്തോടെ സ്വീകരിക്കപ്പെട്ടത്.
