മുംബൈ : മാട്രിമോണിയല് സൈറ്റുകളിലൂടെ പരിചയപ്പെട്ട 40ല് പരം സ്ത്രീകളെ ചതിച്ചയാളെ പൊലീസ് അറസ്റ്റ് ചെയ്തു. കല്യാണ് ഈസ്റ്റ് നിവാസി അനുരാഗ് ചവാന് എന്നറിയപ്പെടുന്ന വിശാല് സുരേഷ് ചവാന് (34) ആണ് അറസ്റ്റിലായത്. ഇയാള് ബിടെക്, എംബിഎ ബിരുദധാരിയാണെന്നും പോലീസ് വെളിപ്പെടുത്തി. മൊബൈല് ഉദ്പാദിപ്പിക്കുന്ന കമ്പനിയിലെ ഉദ്യോഗസ്ഥനാണെന്നു പരിചയപ്പെടുത്തി സമ്പന്ന കുടുംബത്തിലെ സ്ത്രീകളുമായി നേരിട്ടു ബന്ധം സ്ഥാപിക്കുകയായിരുന്നു രീതി. ഇവരില് നിന്നു ഇയാള് ലക്ഷങ്ങള് തട്ടിയെടുത്തു എന്നാണു ആരോപണം.
എന്നാല്, പല സ്ത്രീകളും പരാതിപ്പെടാന് മടിക്കുകയാണെന്നും പോലീസ് വെളിപ്പെടുത്തി. ഷെയര് മാര്ക്കറ്റില് നിക്ഷേപിക്കാമെന്നു വിശ്വസിപ്പിച്ചു തന്നില് നിന്നു 2.25 ലക്ഷം രൂപ തട്ടിയെടുത്തെന്നാരോപിച്ച് 25 വയസ്സുള്ള സ്ത്രീ നല്കിയ പരാതിയെ തുടര്ന്നാണ് അറസ്റ്റ്. ഐഫോണ് തരാമെന്നു വിശ്വസിപ്പിച്ച് 30 പേരെ ഇയാള് ചതിച്ചെന്നും പോലീസ് വെളിപ്പെടുത്തി. ഇയാള്ക്കെതിരെ പീഡനക്കേസ്, ചില തട്ടിപ്പുകേസുകള് എന്നിവ നേരത്തെ റജിസ്റ്റര് ചെയ്തിട്ടുണ്ടെന്നും പൊലീസ് കണ്ടെത്തി. 17 ലക്ഷം രൂപ തട്ടിയെടുത്തെന്ന 2017ലെ കേസില് ഇയാളെ അറസ്റ്റ് ചെയ്തിരുന്നു. കോടതിയില് ഇയാള് മുഴുവന് തുകയും കെട്ടിവച്ച ശേഷമാണ് അന്നു കോടതി ജാമ്യം ലഭിച്ചത്.
