തിരുവനന്തപുരം : ഈ അധ്യയന വർഷം കലോത്സവവും ശാസ്ത്രോത്സവവും കായികമേളയും വിദ്യാരംഗം സര്‍ഗോത്സവവുമെല്ലാം സമയബന്ധിതമായി സംഘടിപ്പിക്കുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി. നോർത്ത് പറവൂർ ഗവർമെന്റ് ഹയർസെക്കണ്ടറി സ്കൂൾ (ബോയ്സ് ) ശതോത്തര സുവർണ ജൂബിലി ഉത്ഘാടനം ചെയ്യുകയായിരുന്നു മന്ത്രി.
പഠനമെന്നത് സിലബസ് അധിഷ്ഠിതമായ പരീക്ഷാവിജയം മാത്രമല്ല. വിദ്യാര്‍ത്ഥികളുടെ കലാകായിക മികവുകള്‍ അംഗീകരിക്കപ്പെടുകയും അതിനുള്ള അവസരങ്ങള്‍ സൃഷ്ടിക്കപ്പെടുകയും വേണം. പഠനത്തോടൊപ്പം തന്നെ കുട്ടികളുടെ സര്‍ഗാത്മക വളര്‍ച്ചയ്ക്കായി നിരവധി പദ്ധതികള്‍ വിദ്യാഭ്യാസവകുപ്പ് ആവിഷ്കരിച്ചിട്ടുണ്ട്. അവയെല്ലാം ഈ വര്‍ഷം പൂര്‍ണതോതില്‍ പ്രവര്‍ത്തനക്ഷമമാക്കാനാണ് ഉദ്ദേശിക്കുന്നത്. ഇതോടൊപ്പംതന്നെ പഠനവുമായി ബന്ധപ്പെട്ട വിവിധവിഷയസ്പര്‍ശിയായ സെമിനാറുകളും ശില്പശാലകളും നടക്കണം. കുട്ടികള്‍ക്കും അധ്യാപകര്‍ക്കും ഇവയില്‍ സജീവമായിത്തന്നെ പങ്കെടുക്കാനും കഴിയണമെന്നും മന്ത്രി പറഞ്ഞു. പ്രതിപക്ഷ നേതാവ് വി ഡി സതീശൻ ചടങ്ങിൽ അധ്യക്ഷനായിരുന്നു.
