തിരുവനന്തപുരം> സിഎംആർഎല്ലുമായി ബന്ധപ്പെടുത്തി മുഖ്യമന്ത്രി പിണറായി വിജയനും മകള് വീണ വിജയനുമെതിരെ അന്വേഷണം ആവശ്യപ്പെട്ട് നൽകിയ ഹർജിയിൽ മലക്കം മറിഞ്ഞ് മാത്യു കുഴൽനാടൻ എംഎൽഎ. ഹർജിയിൽ കോടതി നേരിട്ട് കേസെടുത്താല് മതിയെന്നാണ് മാത്യു കുഴൽനാടന്റെ പുതിയ നിലപാട്.
നേരത്തെ വിജിലൻസ് അന്വേഷണത്തിന് ഉത്തരവിടണമെന്നാവശ്യപ്പെട്ടാണ് ഹർജി നൽകിയിരുന്നത്. ഈ ഹർജിയിൽ ഇന്ന് ഉത്തരവ് പറയാനിരിക്കെയാണ് മാത്യൂ കുഴൽനാടൻ നിലപാട് മാറ്റിയത്. ഇതോടെ, ഏതെങ്കിലും ഒന്നിൽ ഉറച്ച് നിൽക്കൂവെന്ന് തിരുവനന്തപുരം വിജിലന്സ് കോടതി മാത്യു കുഴൽനോട് പറഞ്ഞു.
അതേസമയം മാത്യു കുഴൽനാടൻ്റെ നടപടിയിലൂടെ ഹർജി രാഷ്ട്രീയ പേരിതമാണെന്ന് വ്യക്തമാകുന്നതായി വിജിലൻസ് അഭിഭാഷകൻ കോടതിയില് പറഞ്ഞു. വിധി പറയാനായി ഹർജി ഈ മാസം 12 ലേക്ക് മാറ്റി. ധാതുമണൽ ഖനനത്തിനായി സിഎംആർഎൽ കമ്പനിക്ക് അനുമതി നൽകിയതിന് പ്രതിഫലമായി മുഖ്യമന്ത്രി പിണറായി വിജയന്റെ മകള് വീണ വിജയന് പണം ലഭിച്ചുവെന്ന് ആരോപിച്ചാണ് ഹർജി നൽകിയിട്ടുള്ളത്. 7 പേർക്കെതിരെ ഫെബ്രുവരി 29 നാണ് മാത്യു കുഴൽനാടൻ ഹര്ജി സമര്പ്പിച്ചത്.
