കുവൈത്ത് സിറ്റി: കുവൈത്തില്‍ പൊലീസ് വാഹനവുമായി കൂട്ടിയിടിച്ച് അപകടമുണ്ടാക്കി. ശേഷം സ്ഥലത്ത് നിന്ന് മുങ്ങിയ യുവാവിനെ പിടികൂടി. വാഹനം നിര്‍ത്താന്‍ ആവശ്യപ്പെട്ടപ്പോഴാണ് യുവാവ് ഓടിച്ചിരുന്ന വാഹനം പൊലീസ് കാറിനെ ഇടിച്ചത്. ഇടിയുടെ ആഘാതത്തില്‍ പൊലീസ് വാഹനം നിയന്ത്രണം വിട്ട് മറിഞ്ഞു.
യുവാവിനെ സുരക്ഷാ അധികൃതര്‍ പിടികൂടിയതായി ആഭ്യന്തര മന്ത്രാലയം വ്യക്തമാക്കി. ലഹരി വസ്തു ഉപയോഗിച്ച് അസാധാരണ അവസ്ഥയിലായിരുന്ന യുവാവാണ് പൊലീസ് പട്രോള്‍ വാഹനത്തെ ഇടിച്ചത്. അപകടത്തെ തുടര്‍ന്ന് ഇയാള്‍ സ്ഥലത്ത് നിന്ന് രക്ഷപ്പെടുകയായിരുന്നു. പ്രതിയെ പിടികൂടി തുടര്‍ നിയമ നടപടികള്‍ സ്വീകരിക്കുന്നതിനായി ബന്ധപ്പെട്ട വകുപ്പുകള്‍ക്ക് കൈമാറി.
