തിരുവനന്തപുരം : തിരുവനന്തപുരം മെഡിക്കല് കോളജില് അത്യാഹിത വിഭാഗത്തിലെത്തുന്നവര്ക്ക് കാലതാമസമില്ലാതെ അടിയന്തര വിദഗ്ധ ചികിത്സ ഉറപ്പാക്കാന് പുതിയ സംവിധാനമേര്പ്പെടുത്തുന്നു. സര്ജറി, തീവ്രപരിചരണം എന്നിവ ഒട്ടും കാലതാമസം വരുത്താതിരിക്കാനാണ് പുതിയ സംവിധാനം. അപകടത്തില് പെടുന്നവർക്കും മറ്റ് രോഗികൾക്കും സേവനം ലഭ്യമാകും. അത്യാഹിത വിഭാഗത്തില് 24 മണിക്കൂറും സീനിയര് ഡോക്ടര്മാരുടെ സേവനം ഉണ്ടാകും. ഇതുകൂടാതെയാണ് പുതിയ സംവിധാനം. മെഡിക്കല് കോളജില് ചെസ്റ്റ് പെയിന് ക്ലിനിക് തുടങ്ങും. നെഞ്ച് വേദന മറ്റ് ഹൃദസംബന്ധമായ അസുഖങ്ങൾ ഉളളവർക്ക് ഉടനടി ചികിത്സ ലഭ്യമാക്കുകയാണ് ലക്ഷ്യം. ഇവരെ കാര്ഡിയോളജി വിഭാഗത്തിലേക്ക് മാറ്റി അടിയന്തര ചികിത്സ നല്കും. കാലതാമസമില്ലാതെ ആവശ്യമായവര്ക്ക് ഐ.സി.യു, ആന്ജിയോഗ്രാം, ആന്ജിയോപ്ലാസ്റ്റി ചികിത്സകള് നല്കും.
അപകടങ്ങളില്പ്പെട്ട് അതീവ ഗുരുതരാവസ്ഥയില് എത്തുന്ന രോഗികള്ക്ക് ചികിത്സ ഒട്ടും വൈകാതിരിക്കാന് ചുവപ്പ് ടാഗ് നല്കും. ചുവപ്പ് ടാഗ് ഉള്ളവര്ക്ക് എക്സ്റേ, സ്കാന് തുടങ്ങിയ പരിശോധനകള്ക്കുള്പ്പെടെ ക്യൂ ഇല്ലാതെ ആദ്യ പരിഗണന നല്കും. സര്ജറി വിഭാഗത്തിന് കീഴില് മറ്റ് വിഭാഗങ്ങളുടെ സഹകരണത്തോടെ ഉടനടി വിദഗ്ധ ചികിത്സ ഉറപ്പാക്കും. ശസ്ത്രക്രിയ വേണ്ടവര്ക്ക് അടിയന്തരമായി ശസ്ത്രക്രിയയും നടത്തും.
