ഓസീസ് മുന്‍ താരം ഗ്ലെന്‍ മഗ്രാത്തിനു കൊവിഡ് സ്ഥിരീകരിച്ചു. ഇതോടെ ആഷസ് പരമ്പരയിലെ നാലാം മത്സരം കാണാന്‍ മഗ്രാത്ത് എത്തില്ല. മഗ്രാത്തിന്റെ മരണപ്പെട്ട ഭാര്യ ജെയിന് ആദരവര്‍പ്പിച്ചാണ് സിഡ്‌നി ടെസ്റ്റ് നടത്തുന്നത്. മത്സരം കാണാന്‍ മഗ്രാത്ത് എത്താനിരുന്നതാണ്. എന്നാല്‍, കൊവിഡ് പോസിറ്റീവായതിനാല്‍ അദ്ദേഹം എത്തില്ലെന്ന് ക്രിക്കറ്റ് ഓസ്‌ട്രേലിയ അറിയിച്ചു. നെഗറ്റീവായാല്‍ ടെസ്റ്റിന്റെ മൂന്നാം ദിവസം അദ്ദേഹം സ്റ്റേഡിയത്തിലെത്തിയേക്കും. അതേസമയം ഇംഗ്ലണ്ട് പരിശീലകന്‍ ക്രിസ് സില്‍വര്‍വുഡിനെ പുറത്താക്കിയേക്കുമെന്ന് സൂചനയുണ്ട്. ആഷസ് പരമ്പരയില്‍ ടീമിന്റെ ദയനീയ പ്രകടനങ്ങളാണ് സില്‍വര്‍വുഡിനു തിരിച്ചടി ആയിരിക്കുന്നത്. ആദ്യ മൂന്ന് മത്സരങ്ങളിലും പരാജയപ്പെട്ട ഇംഗ്ലണ്ടിന് ആഷസ് പരമ്പര നഷ്ടമായിക്കഴിഞ്ഞു. പരാജയങ്ങള്‍ക്കുപരി ഒന്ന് പൊരുതുക പോലും ചെയ്യാതെ ടീം കീഴടങ്ങിയതാണ് സില്‍വര്‍വുഡിന്റെ പദവിക്ക് ഭീഷണി ആയിരിക്കുന്നത്.
