തിരുവനന്തപുരം : കൊല്ലപ്പെട്ട എസ്എഫ്ഐ പ്രവർത്തകൻ ധീരജിന്റെ വീട്ടിൽ പോകണമെന്ന് ആഗ്രഹമുണ്ടെങ്കിലും സാധിക്കില്ലെന്ന് കെപിസിസി അധ്യക്ഷൻ കെ.സുധാകരൻ. ധീരജിന്റേത് കോൺഗ്രസ് കുടുംബമാണ്. തന്റെ മനസ്സ് കല്ലും ഇരുമ്പുമല്ല. ധീരജിന്റെ മരണത്തിൽ ദുഃഖിച്ചില്ലെന്ന് പറയുന്നത് ക്രൂരമാണ്. സിപിഎം ശവകുടീരം കെട്ടിപ്പൊക്കിയും തിരുവാതിര കളിച്ചും ധീരജിന്റെ മരണം ആഘോഷിച്ചു. നിഖിൽ പൈലിയെ എസ്എഫ്ഐക്കാർ പിന്തുടർന്ന് വളഞ്ഞ് ആക്രമിച്ചു. ഇടികൊണ്ട് നിഖിൽ പൈലി വീണു. കുത്തേറ്റുവീണ ധീരജിനെ ആശുപത്രിയിൽ കൊണ്ടുപോകാൻ പോലീസുകാർ തയാറാകാതിരുന്നതെന്താണ്?. പോലീസുകാർക്കുപോലും എസ്എഫ്ഐ ശല്യമാണ്. അക്രമം കൊണ്ട് ക്യാപംസുകളിൽ പിടിച്ചു നിൽക്കുന്ന സംഘടനയാണ് എസ്എഫ്ഐ എന്നും സുധാകരൻ പറഞ്ഞു.
