മലപ്പുറം: കൽപ്പറ്റയിൽ രാഹുൽ ഗാന്ധിയുടെ ഓഫിസ് ആക്രമണത്തിലൂടെ സിപിഎം ഉന്നംവച്ചത് ബിജെപിയെയാണെന്ന് കേന്ദ്ര വിദേശകാര്യ സഹമന്ത്രി വി.മുരളീധരൻ. എൻഡിഎയുടെ രാഷ്ട്രപതി സ്ഥാനാർഥി ഗോത്രവർഗ പ്രതിനിധിയായത് ഉൾക്കൊള്ളാനാകാത്ത സിപിഎം, ആദിവാസി ഗോത്രവർഗ ജനവിഭാഗത്തിന്റെ ശ്രദ്ധ തിരിക്കാനാണ് വയനാട്ടിൽ കുഴപ്പമുണ്ടാക്കിയതെന്നു മുരളീധരൻ പറഞ്ഞു.
സ്വർണക്കടത്തടക്കം സർക്കാരും പാർട്ടിയും പ്രതിരോധത്തിലായ വിഷയങ്ങളിൽനിന്ന് വാർത്തകളെ വഴിതിരിച്ചുവിടേണ്ടതുണ്ട്. എസ്എഫ്ഐയെ അഴിച്ചുവിട്ട് പിണറായി വിജയൻ ശ്രമിക്കുന്നത് ഇതിനാണെന്നും കേന്ദ്രമന്ത്രി എടപ്പാളിൽ ആരോപിച്ചു.രാഷ്ട്രപതി തിരഞ്ഞെടുപ്പിൽ സാമാജികർ ആർക്കൊപ്പം എന്നതിലൂടെ അവരുടെ നയവും മനസ്സിലാക്കാനാകുമെന്നും വി.മുരളീധരൻ പറഞ്ഞു. പാവപ്പെട്ടവർക്കൊപ്പം നിലകൊള്ളുന്നവർക്ക് ദ്രൗപദി മുർമുവിന് പിന്തുണ പ്രഖ്യാപിക്കേണ്ടിവരുമെന്നും മന്ത്രി പറഞ്ഞു.
