മലപ്പുറം : പ്രായപൂർത്തിയാകാത്ത മകളെ പീഡിപ്പിച്ചു ഗർഭിണിയാക്കി 7 വർഷം മുൻപു നാടുവിട്ട അതിഥിത്തൊഴിലാളിയെ (49) രാജസ്ഥാനിലെ ഭിവാഡിയിൽ നിന്നു പെരുമ്പടപ്പ് പോലീസ് അറസ്റ്റ് ചെയ്തു. ബിഹാർ മുസഫർപുർ സ്വദേശിയാണു പിടിയിലായത്. മൂന്നാം ഭാര്യയുടെ സഹോദരനൊപ്പം ജോലി ചെയ്തുവരുന്നതിനിടെയാണു പ്രതി പിടിയിലായത്. ബിഹാറിലെ ആദ്യ ഭാര്യയുടെ മരണശേഷം ഇരട്ട പെൺകുട്ടികളുമായി വർഷങ്ങൾക്കു മുൻപാണു പ്രതി പെരുമ്പടപ്പിലെത്തിയത്. മലയാളിയായ രണ്ടാം ഭാര്യയ്ക്കൊപ്പം താമസിച്ചവരുന്നതിനിടെ 2016ൽ ആണ് കേസിനാസ്പദമായ സംഭവം.
കേരളത്തിൽനിന്നു കടന്നുകളഞ്ഞ പ്രതിയെ നാലു സംസ്ഥാനങ്ങളിൽ നേരിട്ടെത്തി അന്വേഷണം നടത്തിയാണ് പെരുമ്പടപ്പ് പോലീസ് പിടികൂടിയത്. ബിഹാറിൽ പ്രതിയുടെ ഗ്രാമത്തിലും അവിടെനിന്നു കിട്ടിയ വിവരങ്ങളുടെ അടിസ്ഥാനത്തിൽ ഗുജറാത്തിലെ അഹമ്മദാബാദിലും ചെന്നൈക്കു സമീപത്തെ തൊണ്ടയാർപെട്ടിലും പോലീസ് സംഘം എത്തി. ഇതിനിടെയാണ്, ബിഹാറിൽ നേപ്പാളിനോടു ചേർന്ന സീതാമഡിയിൽ നിന്ന് ഇയാൾ മൂന്നാം വിവാഹം കഴിച്ചതെന്ന വിവരം ലഭിച്ചത്. പീഡിപ്പിക്കപ്പെട്ട ഇപ്പോൾ 22 വയസ്സുള്ള പെൺകുട്ടി നിലവിൽ സർക്കാർ സംരക്ഷണ കേന്ദ്രത്തിലാണ്. എസ്പി എസ്.സുജിത് ദാസിന്റെ നിർദേശപ്രകാരം തിരൂർ ഡിവൈഎസ്പി വി.വി.ബെന്നിയുടെ നേതൃത്വത്തിൽ പെരുമ്പടപ്പ് പോലീസ് ഇൻസ്പെക്ടർ പി.എം.വിമോദ്, എഎസ്ഐ പ്രീത, സിപിഒമാരായ രഞ്ജിത്ത്, നാസർ വിഷ്ണു നാരായണൻ എന്നിവരാണു പ്രതിയെ പിടികൂടിയത്.
