ബെംഗളൂരു : മലയാളി യുവ മാധ്യമപ്രവർത്തകയെ ബെംഗളൂരുവിലെ ഫ്ളാറ്റിൽ മരിച്ചനിലയിൽ കണ്ടെത്തിയിട്ട് ഒരാഴ്ചകഴിഞ്ഞിട്ടും ആരോപണവിധേയനായ ഭർത്താവിനെ കണ്ടെത്താനാകാതെ ബെംഗളൂരു പോലീസ്. റോയ്ട്ടേഴ്സിന്റെ ബെംഗളൂരുവിലെ സബ് എഡിറ്റർ കാസർകോട് വിദ്യാനഗർ സ്വദേശി ശ്രുതി നാരായണന്റെ(35) ഭർത്താവ് അനീഷ് കൊയ്യോടാൻ കോറോത്തിനെ (42) കണ്ടെത്താനായിട്ടില്ലെന്ന് ബെംഗളൂരു വൈറ്റ്ഫീൽഡ് പോലീസ് അറിയിച്ചു. ഇയാളെ കണ്ടെത്തി ചോദ്യംചെയ്താലേ കേസിൽ തുടർനടപടിയുണ്ടാകൂവെന്ന് പോലീസ് പറഞ്ഞു. കഴിഞ്ഞ തിങ്കളാഴ്ചയാണ് ശ്രുതി നാരായണനെ വൈറ്റ്ഫീൽഡ് നരഹനഹള്ളിയിലെ ഫ്ളാറ്റിൽ ജീവനൊടുക്കിയനിലയിൽ കണ്ടെത്തിയത്. ഭർത്താവിന്റെ പീഡനത്തെത്തുടർന്നാണ് ശ്രുതി ആത്മഹത്യചെയ്തതെന്നാണ് കുടുംബത്തിന്റെ പരാതി. ആത്മഹത്യാപ്രേരണയടക്കമുള്ള കുറ്റങ്ങൾ ചുമത്തി ഇയാളുടെപേരിൽ പോലീസ് കേസെടുത്തിരുന്നു.
