ദില്ലി: ഡല്‍ഹിയിലേക്കുള്ള എയര്‍ ഇന്ത്യ വിമാനം അടിയന്തരമായി നിലത്തിറക്കി. ടേക്ക് ഓഫിനിടെ യാത്രക്കാരന്റെ മൊബൈല്‍ ഫോണ്‍ പൊട്ടിത്തെറിച്ചതിനെ തുടര്‍ന്നാണ് വിമാനം ഉദയ്പൂര്‍ വിമാനത്താവളത്തില്‍ അടിയന്തരമായി തിരിച്ചിറക്കിയത്. അതേസമയം സാങ്കേതിക പരിശോധനകള്‍ക്ക് ശേഷം വിമാനം ഡല്‍ഹിയിലേക്ക് പുറപ്പെട്ടു. തിങ്കളാഴ്ച ഉച്ചയ്ക്ക് ഒരു മണിയോടെയാണ് സംഭവം. രാജസ്ഥാനിലെ ഉദയ്പൂരില്‍ നിന്ന് ഡല്‍ഹിയിലേക്ക് പുറപ്പെട്ട എയര്‍ ഇന്ത്യയുടെ 470 നമ്പര്‍ വിമാനമാണ് അടിയന്തരമായി നിലത്തിറക്കിയത്. വിമാനം പറന്നുയരുന്നതിനിടെ യാത്രക്കാരന്റെ മൊബൈല്‍ പൊട്ടിത്തെറിച്ചതിനെ തുടര്‍ന്നാണ് അടിയന്തരമായി ഇറക്കിയതെന്നാണ് സൂചന.
