കൊച്ചി : നടി ആക്രമിക്കപ്പെട്ട കേസിലെ അന്വേഷണ ഉദ്യോഗസ്ഥരെ കൊല്ലാന് ഗൂഡാലോചന നടത്തിയെന്ന കേസില് ദിലീപ് ഉള്പ്പെടെയുള്ള പ്രതികളെ ചോദ്യം ചെയ്യുന്നത് മൂന്നാം ദിവസമായ ഇന്നും തുടരും. രാത്രി എട്ട് മണിക്ക് ചോദ്യം ചെയ്യല് അവസാനിപ്പിക്കണം എന്നാണ് ഹൈക്കോടതിയുടെ നിര്ദ്ദേശം. ചോദ്യം ചെയ്യലിന്റെ അവസാന ദിവസമായ ഇന്ന് പരാതിക്കാരനായ സംവിധായകന് ബാലചന്ദ്രകുമാറിനെ കൂടി വിളിപ്പിക്കാന് ക്രൈംബ്രാഞ്ച് ഉദ്ദേശിച്ചിരുന്നുവെങ്കിലും ഒഴിവാക്കി. ഇപ്പോഴത്തെ സാഹചര്യത്തില് അതിന്റെ ആവശ്യമില്ലെന്ന് അന്വേഷണ സംഘം വ്യക്തമാക്കി. നാളെ റിപ്പബ്ലിക് ദിനമായതിനാല് ഹൈക്കോടതി അവധിയാണ്. കേസിന്റെ അന്വഷണപുരോഗതിയും ചോദ്യം ചെയ്യലിന്റെ വിവരങ്ങളും വ്യാഴാഴ്ച അറിയിക്കണമെന്നാണ് ഹൈക്കോടതി നിര്ദ്ദേശം. ഈ റിപ്പോര്ട്ടുകള് കൂടി പരിഗണിച്ച ശേഷമായിരിക്കും പ്രതികളുടെ മുന്കൂര് ജാമ്യാപകേഷയില് കോടതി ഉത്തരവ് പുറപ്പെടുവിക്കുക. ഗൂഡാലോചനയില് കഴമ്പുണ്ടെന്ന് കണ്ടാല് ഹൈക്കോടതി മുന്കൂര് ജാമ്യഹര്ജി തള്ളി വിധി പുറപ്പെടുവിക്കും.
അതേസമയം ദിലീപിനെ നായകനാക്കി ബാലചന്ദ്രകുമാര് സംവിധാനം ചെയ്യാനിരുന്ന പിക് പോക്കറ്റ് സിനിമയില് നിന്ന് പിന്മാറുന്നതായി തന്നെ അറിയിച്ചത് ബാലചന്ദ്രകുമാര് തന്നെയാണെന്ന് സംവിധായകന് റാഫി ഇന്നലെ വെളിപ്പെടുത്തിയിരുന്നു. ക്രൈംബ്രാഞ്ച് ഓഫീസില് മൊഴി നല്കിയതിന് ശേഷമായിരുന്നു റാഫിയുടെ പ്രതികരണം. ദിലീപിനോട് വൈരാഗ്യമുള്ളതായി ബാലചന്ദ്രകുമാര് പറഞ്ഞിട്ടില്ല. പക്ഷേ പിക് പോക്കറ്റ് സിനിമ നീണ്ട് പോകുന്നതില് ബാലചന്ദ്രകുമാറിന് വിഷമം ഉണ്ടായിരുന്നുവെന്നും റാഫി പറഞ്ഞു. എന്തു കൊണ്ടാണ് സിനിമയില് നിന്നും പിന്മാറിയതെന്നതിനെകുറിച്ച് അറിയില്ല. പിന്മാറിയെന്ന് മാത്രമാണ് തന്നെ വിളിച്ചറിയിച്ചതെന്നും അദ്ദേഹം പറഞ്ഞു. പിക് പോക്കറ്റ് സിനിമയില് നിന്ന് പിന്മാറിയത് താനായിരുന്നുവെന്ന ദിലീപിന്റെ ഹൈക്കോടതിയിലെ സത്യവാങ്മൂലത്തിന് വിരുദ്ധമാണ് റാഫിയുടെ വെളിപ്പെടുത്തല്.
ജയിലില് നിന്നിറങ്ങിയ ശേഷം പോക്കറ്റടിക്കാരന്റെ റോള് ചെയ്യുന്നത് തനിക്ക് ദോഷം ചെയ്യുമെന്ന് ബാലചന്ദ്രകുമാറിനെ അറിയിച്ചിരുന്നുവെന്നും ഇതിനെറെ ദേഷ്യത്തിലാണ് ബാലചന്ദ്രകുമാര് കള്ളപരാതി നല്കിയത് എന്നുമാണ് ദിലീപ് പറഞ്ഞിരുന്നത്. അതിനിടെ നടിയെ അക്രമിച്ച കേസുമായി ബന്ധപ്പെട്ട് വൈകാതെ തന്നെ കാര്യങ്ങളെല്ലാം സുനില് കുമാര് തുറന്ന് പറയമെന്ന് സുനില് കുമാറിന്റെ അമ്മ വ്യക്തമാക്കി. സുനില് കുമാറിനെ ജയിലില് കണ്ട ശേഷമായിരുന്നു ശോഭനയുടെ പ്രതികരണം. നടന്ന സംഭവങ്ങള് പുറം ലോകത്തോട് പറയുമെന്ന് സുനില് കുമാര് പറഞ്ഞു. ചെയ്ത് പോയതില് സുനിലിന് കുറ്റ ബോധമുണ്ട്. ദിലീപിന്റെ വാക്കില് താന് പെട്ട് പോയി എന്നാണ് സുനില് കുമാര് പറഞ്ഞതെന്നും ശോഭന കൂട്ടിച്ചേര്ത്തിരുന്നു.
