കൊച്ചി: എസ്.ഡി.പി.ഐയുടെ പ്രവർത്തനങ്ങളോട് യോജിപ്പില്ലെന്ന് കോൺഗ്രസ് നേതാവ് രമേശ് ചെന്നിത്തല. എന്നാൽ, ആരുടെയും വോട്ട് വേണ്ടെന്ന് പറയാനാകില്ല. തെരഞ്ഞെടുപ്പുമായി ബന്ധപ്പെട്ട് എന്ത് തീരുമാനമെടുക്കാനും അവർക്ക് അവകാശമുണ്ട്. അവരുമായി ഒരു ചർച്ചയും ഞങ്ങൾ നടത്തിയിട്ടില്ല. ഒരുവിധ രാഷ്ട്രീയ ധാരണയുമില്ല -അദ്ദേഹം പറഞ്ഞു.
സാധാരണഗതിയിൽ എല്ലാവരോടും വോട്ട് അഭ്യർഥിക്കാറുണ്ട്. അവരോട് അതുപോലും ചെയ്തിട്ടില്ല. വർഗീയ പാർട്ടിയാണോ എന്ന് സർട്ടിഫിക്കറ്റ് നൽകാൻ താനാളല്ല. ചാവക്കാട്ട് കോൺഗ്രസ് പ്രവർത്തകനെ എസ്.ഡി.പി.ഐ കൊലപ്പെടുത്തിയപ്പോൾ അന്ന് താനടക്കമുള്ളവർ ശക്തമായി പ്രതിഷേധിച്ചിരുന്നെന്നും അദ്ദേഹം പറഞ്ഞു.
