ചവറ: മദ്റസയില്‍ പോയ പതിനൊന്നുകാരനെ കുത്തി പരിക്കേല്‍പിച്ചതായി പരാതി. ചവറ കൊട്ടുകാട് വട്ടത്തറ കളീക്കത്തറ പടീറ്റതില്‍ അബ്ദുല്‍ സലീമിന്റെ മകന്‍ സുഫിയാനാണ് (11) അക്രമിയുടെ കുത്തേറ്റത്. വ്യാഴാഴ്ച രാവിലെ ഏഴോടെയായിരുന്നു സംഭവം. സൈക്കിളില്‍ പോകുന്നവഴി കൊട്ടുകാട് ഖാദിരിയ്യ സ്‌കൂളിന് സമീപം അയല്‍വാസിയായ ഷഹനാസ് (27) ആണ് ആക്രമിച്ചത്. ഇയാള്‍ക്കെതിരെ പോലീസ് കേസെടുത്തു. നിരവധി ക്രിമിനല്‍ കേസിലെ പ്രതിയാണിയാൾ.
കുട്ടിയെ സൈക്കിളില്‍നിന്ന് തള്ളിയിട്ട ശേഷം ചവിട്ടുകയും കഴുത്തിലും മുതുകിലും കുത്തിയതായും പൊലീസ് പറഞ്ഞു. ആക്രമത്തില്‍ പരിക്കേറ്റ സുഫിയാന്‍ കൊല്ലത്തെ സ്വകാര്യ ആശുപത്രിയില്‍ ചികിത്സയിലാണ്. കുട്ടിയുടെ പിതാവ് അബ്ദുൽസലീമിന്റെ കുടുംബവുമായുള്ള ശത്രുതയാണ് കുട്ടിയെ ആക്രമിച്ചതിന് പിന്നിലെന്നും ഒളിവില്‍ പോയ ഇയാള്‍ക്കെതിരെ വധശ്രമത്തിന് കേസ് രജിസ്റ്റര്‍ ചെയ്തതായും ചവറ പോലീസ് അറിയിച്ചു.
