ന്യൂഡൽഹി: ഹരിയാനയിലെ വിമത കോണ്ഗ്രസ് എംഎല്എ കുല്ദീപ് ബിഷ്ണോയ് ഉടന് ബിജെപിയില് ചേരും. ആഭ്യന്തരമന്ത്രി അമിത് ഷായുമായും ബിജെപി അധ്യക്ഷന് ജെ.പി. നഡ്ഡയുമായും കുല്ദീപ് ബിഷ്ണോയ് കൂടിക്കാഴ്ച നടത്തി. ഇരുവരുടെയും രാജ്യത്തെക്കുറിച്ചുള്ള കാഴ്ചപ്പാടുകള് വിസ്മയിപ്പിക്കുന്നതാണെന്നു കൂടിക്കാഴ്ചയുടെ ചിത്രങ്ങള് പങ്കുവച്ച് കുല്ദീപ് ബിഷ്ണോയ് ട്വീറ്റ് ചെയ്തു.
ജെ.പി. നഡ്ഡയുമായുള്ള കൂടിക്കാഴ്ച അഭിമാനമേറ്റുന്ന കാര്യമാണെന്നും കുൽദീപ് അവകാശപ്പെട്ടു. രാജ്യസഭ തിരഞ്ഞെടുപ്പില് കൂറുമാറി വോട്ട് ചെയ്തതിനെ തുടര്ന്ന് എല്ലാ പദവികളില്നിന്നും കുല്ദീപ് ബിഷ്ണോയിയെ കോണ്ഗ്രസ് നീക്കിയിരുന്നു. ആദംപൂരിൽനിന്നുള്ള കോൺഗ്രസ് എംഎൽഎയാണ് കുൽദീപ് ബിഷ്ണോയ്. ഹരിയാന മുൻ മുഖ്യമന്ത്രി ഭജൻ ലാലിന്റെ ഇളയ മകനാണ് കുല്ദീപ്.
രാജ്യസഭാ തിരഞ്ഞെടുപ്പിൽ ക്രോസ് വോട്ട് ചെയ്തതിനു പിന്നാലെ കുൽദീപ് ബിഷ്ണോയിയുടെ രാഷ്ട്രീയ ഭാവിയെക്കുറിച്ച് അഭ്യൂഹങ്ങൾ പരന്നിരുന്നു. മണ്ഡലത്തിലെ ജനങ്ങളുമായി ചർച്ച ചെയ്ത ശേഷമായിരിക്കും അടുത്ത നീക്കമെന്ന് കുൽദീപ് ബിഷ്ണോയ് നേരത്തേ പ്രതികരിച്ചിട്ടുണ്ട്.
