തൃശ്ശൂർ : കുന്ദംകുളത്ത് പ്രവർത്തിക്കുന്ന മാട്രിമോണിയൽ സ്ഥാപനത്തിൽ തീപിടുത്തം. എംബി മാൾ കെട്ടിടത്തിൽ പ്രവർത്തിക്കുന്ന സ്ഥാപനത്തിലാണ് ഇന്ന് രാവിലെ ഏഴരയോടെ തീപിടുത്തമുണ്ടായത്. സ്ഥാപനത്തിലെ കംപ്യൂട്ടറുകളും ഇലക്ട്രിക് ഉപകരണങ്ങളും സ്ഥാപനത്തിലുണ്ടായിരുന്ന രേഖകളും കത്തി നശിച്ചു. രാവിലെ സ്ഥാപനത്തിനുള്ളിൽ നിന്ന് വലിയ രീതിയിൽ പുക ഉയരുന്നത് കണ്ട നാട്ടുകാരും യാത്രക്കാരുമാണ് കുന്ദംകുളം ഫയർ‌സ്റ്റേഷനെ വിവരം അറിയിച്ചത്. രണ്ട് മണിക്കൂർ നീണ്ട പരിശ്രമത്തിനൊടുവിലാണ് തീയണച്ചത്. തീപിടുത്തത്തിന് കാരണം ഷോർട്ട് സർക്യൂട്ട് ആണെന്നാണ് പ്രാഥമിക നിഗമനം. അപകടത്തിൽ എത്രത്തോളം നാശനഷ്ടമുണ്ടായെന്ന് പരിശോധിച്ചുവരികയാണ്.
