കട്ടപ്പന : പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ യുവാവിനെ കട്ടപ്പന പോലീസ് അറസ്റ്റ് ചെയ്തു. പുഷ്പക്കണ്ടം ആനക്കല്ല് റോഡുവിള പുത്തൻവീട് അൻവർഷാ(22) ആണ് അറസ്റ്റിലായത്. ഈ കേസിൽ സൂര്യനെല്ലി സ്വദേശിയായ ശ്രീക്കുട്ടൻ, കൽകൂന്തൽ സ്വദേശി രാജേഷ് എന്നിവർ കഴിഞ്ഞ ദിവസം അറസ്റ്റിലായിരുന്നു. പെൺകുട്ടി പ്ലസ്വണ്ണിന് പഠിക്കുമ്പോൾ ഇൻസ്റ്റഗ്രാം മുഖേന പരിചയപ്പെട്ട അൻവർഷാ പെൺകുട്ടിയെ ശാരീരികമായി ഉപദ്രവിച്ചിരുന്നു. അതിനുശേഷം ശല്യം തുടർന്നതോടെ സാമൂഹികമാധ്യമങ്ങളിലൂടെ പരിചയപ്പെട്ട ശ്രീക്കുട്ടനോട് പെൺകുട്ടി ഇക്കാര്യം പറഞ്ഞു. ശ്രീക്കുട്ടൻ അൻവർഷായെ ഭീഷണിപ്പെടുത്തിയതോടെ തുടർന്ന് ശല്യപ്പെടുത്തൽ ഉണ്ടായില്ല.
അതിന്റെ പേരിൽ പെൺകുട്ടിയുമായി അടുപ്പം സ്ഥാപിച്ച ശ്രീക്കുട്ടൻ സുഹൃത്തുക്കളുടെ സഹായത്തോടെ പെൺകുട്ടിയുടെ വീട്ടിലെത്തി പീഡിപ്പിക്കുകയായിരുന്നു. ഈ സംഭവത്തിൽ ശ്രീക്കുട്ടനെയും സുഹൃത്ത് രാജേഷിനെയും കഴിഞ്ഞ ദിവസം പിടികൂടി. അടൂരിലായിരുന്ന അൻവർഷാ കഴിഞ്ഞ ദിവസം നെടുങ്കണ്ടത്ത് എത്തിയതായി സൈബർ സെല്ലിന്റെ സഹായത്തോടെ കണ്ടെത്തിയ പോലീസ് ഇയാളെ പിടികൂടുകയായിരുന്നു. ഡിവൈ.എസ്.പി. വി.എ.നിഷാദ്മോന്റെ നേതൃത്വത്തിൽ എസ്.എച്ച്.ഒ. വിശാൽ ജോൺസൺ, പ്രിൻസിപ്പൽ എസ്.ഐ. കെ. ദിലീപ്കുമാർ, എ.എസ്.ഐ. കെ.സി. ഹരികുമാർ, എസ്.സി.പി.ഒ. സന്തോഷ്കുമാർ, സി.പി.ഒ.മാരായ പ്രശാന്ത് മാത്യു, സതീഷ്, അരുൺ എന്നിവർ ഉൾപ്പെട്ട സംഘം പിടികൂടിയ പ്രതിയെ കോടതിയിൽ ഹാജരാക്കി റിമാൻഡുചെയ്തു.
