ഹൈദരാബാദ് : ട്യൂഷൻ ക്ലാസിൽ പങ്കെടുക്കാൻ നിർബന്ധിച്ചതിനെ തുടർന്ന് 12-കാരി ഫ്ലാറ്റിന്റെ 15-ാം നിലയിൽ നിന്ന് ചാടി ജീവനൊടുക്കി. വെള്ളിയാഴ്ച വൈകുന്നേരം നല്ലഗണ്ട്ലയിലെ അപ്പാർട്ട്‌മെന്റിലായിരുന്നു സംഭവം. ആറാം ക്ലാസിൽ പഠിക്കുന്ന പെൺകുട്ടി തെല്ലാപൂരിലെ ഒരു സ്കൂളിൽ പഠിക്കുകയായിരുന്നു. അപ്പാർട്ട്‌മെന്റിന്റെ 15-ാം നിലയിലെ ഫ്‌ളാറ്റിൽ ദിവസവും വൈകിട്ട് അഞ്ച് മുതൽ ആറ് വരെ കണക്ക് ട്യൂഷന് പോയിരുന്നു. വെള്ളിയാഴ്ച ഉച്ചകഴിഞ്ഞ് 3.30 ന് സ്കൂളിൽ നിന്ന് വീട്ടിലെത്തിയ ശേഷം ട്യൂഷന് പോകാൻ ഇഷ്ടമല്ലെന്ന് അവൾ മാതാപിതാക്കളോട് പറഞ്ഞിരുന്നു. എന്നാൽ മാതാപിതാക്കൾ നിർബന്ധിച്ചതോടെ വൈകുന്നേരം 4.50 ഓടെ ട്യൂഷനുവേണ്ടി ഫ്ലാറ്റിൽ നിന്ന് ഇറങ്ങി. കണക്ക് ട്യൂഷനു വേണ്ടി അടുത്ത ഫ്ലാറ്റിൽ കയറുന്നതിനുപകരം ഇടനാഴിയിലെ ബാൽക്കണിയുടെ ജനൽ തുറന്ന് പുറത്തേക്ക് ചാടുകയായിരുന്നു എന്നും ചന്ദനഗർ എസ്‌ഐ നാഗേശ്വര റാവു പറഞ്ഞു. ഐടി ജീവനക്കാരനായ പിതാവ് 10 വർഷം മുമ്പാണ് കുടുംബത്തോടൊപ്പം ഹൈദരാബാദിലേക്ക് താമസം മാറിയത്.
